უკრაინული მედიის ცნობით, შაბათს გვიან საღამოს რუსული დრონების იერიშის შედეგად კიევის ობოლონის რაიონში 12-სართულიან საცხოვრებელ კორპუსში ხანძარი გაჩნდა.
კიევის მერის, ვიტალი კლიჩკოს განცხადებით, ობოლონის რაიონში დრონი საცხოვრებელ სახლებს შორის, ტერიტორიაზე ჩავარდა.
მოგვიანებით მერმა განაცხადა, რომ ობოლონში 12-სართულიან საცხოვრებელ კორპუსში მეორე-მეხუთე სართულებზე ხანძარი გაჩნდა. ადგილზე საგანგებო სამსახურები მუშაობენ.
29 აგვისტოს, დღისით, კიევის პოდოლის რაიონში რუსული დრონი არასაცხოვრებელ შენობას დაეცა, ხოლო ობოლონის რაიონში დრონის ჩამოვარდნის შედეგად დაზიანდა კაფე და დაიღუპა 2 წლის გოგონა. არიან დაშავებულებიც.
მოგვიანებით, გავრცელდა ინფორმაცია, რომ დრონების იერიშების შედეგად კიევში დაშავებულთა რაოდენობა 8-მდე გაიზარდა.
უკრაინის საჰაერო ძალების ინფორმაციით, 29 აგვისტოს დღის განმავლობაში რუსეთმა უკრაინაზე უკვე 224 დამრტყმელი დრონით მიიტანა იერიში, რომელთა აბსოლუტური უმრავლესობა კიევისკენ იყო მიმართული.
29 აგვისტოს საღამოს კიევის დნიპროვსკის რაიონში დრონის ნამსხვრევების ჩამოვარდნის შედეგად კერძო საცხოვრებელ სახლს ცეცხლი გაუჩნდა.
