პოლონეთის თავდაცვის მინისტრის მოადგილემ, პაველ ზალევსკიმ განაცხადა, რომ მის ქვეყანას აქვს საწარმოო შესაძლებლობები და მზად არის, უკრაინასთან თანამშრომლობით, პოლონეთის ტერიტორიაზე Patriot-ის სისტემებისთვის PAC-3-ის ტიპის რაკეტსაწინააღმდეგო რაკეტების წარმოება დაიწყოს.
„პოლონეთი ერთ-ერთია იმ ქვეყნებს შორის, რომლებმაც განაცხადეს, რომ აქვთ PAC-3-ის წარმოების შესაძლებლობა და მზად არიან, მათი წარმოება პოლონეთში დაიწყონ... ჩვენ ევროპაში PAC-3-ის ტიპის საბრძოლო საშუალებების წარმოებას მნიშვნელოვან საქმედ მივიჩნევთ, რომელიც ევროპულ უსაფრთხოებას აძლიერებს,“ - განაცხადა ზალევსკიმ.
ზალევსკის თქმით, Patriot-ის სისტემებისთვის PAC-3-ის ტიპის რაკეტსაწინააღმდეგო რაკეტების წარმოების აშშ-ის ფარგლებს გარეთ დაწყება ამერიკელებისთვისაც მნიშვნელოვანია, რადგან ინდუსტრიულ სექტორში საწარმოო შესაძლებლობების აშკარა დეფიციტია.
„ჩვენ არ გვინდა კონკურენცია გავუწიოთ არც უკრაინელებს, არც გერმანელებს და არც სხვას. ამიტომ, თუ შესაძლებელი იქნება კომპანიებსა და ქვეყნებს შორის თანამშრომლობის გარკვეული ფორმის ჩამოყალიბება, ეს კარგი იქნება“, - განუცხადა პოლონელმა მინისტრმა უკრაინულ მედიას.
მისი თქმით, ეს წარმოება „უდავოდ უნდა ემსახურებოდეს არა მხოლოდ ნატო-ს, არამედ უკრაინასაც - შესაძლოა, პირველ რიგში, სწორედ უკრაინას“.
„მნიშვნელოვანია, რომ ჩვენ გვაქვს საკუთარი საწარმოო შესაძლებლობები და შესაბამისი კომპეტენცია და გვსურს, ამ წარმოებას შევუერთდეთ. თუ აღმოჩნდება, რომ ეს წარმოება უკრაინელებთან, გერმანელებთან ან უკრაინელებთან და გერმანელებთან ერთად განხორციელდება, ეს კარგი იქნება. ჩვენ არ გვინდა კონკურენცია, ჩვენ გვსურს ჩვენი უსაფრთხოების გაძლიერება“, - ხაზი გაუსვა პაველ ზალევსკიმ.
მისი თქმით, ამ საკითხზე პოლონეთი ამჟამად მჭიდრო კონტაქტშია Patriot-ის მწარმოებელ კომპანია Lockheed Martin-თან და აშშ-ის ადმინისტრაციასთან.
„ერთი მხრივ, ჩვენ საწარმოო გადაწყვეტილებებს, მეორე მხრივ კი პოლიტიკურ გადაწყვეტილებებს ველოდებით“, - დასძინა მან.
