გამოცემა Politico-სთვის ანონიმურ წყაროებზე დაყრდნობით გახდა ცნობილი, რომ აშშ-ის ცენტრალური სადაზვერვო სააგენტოს (CIA) დირექტორმა ჯონ რატკლიფმა მოსკოვში ვიზიტისას რუსეთის ოფიციალურ პირებს მოუწოდა, თავი შეიკავონ ისეთი ქმედებებისგან, რომლებმაც შესაძლოა აშშ-ის ნატო-ელ მოკავშირეებთან, კერძოდ, ესტონეთთან, ლატვიასა და ლიეტუვასთან, დაპირისპირება გაამწვავოს.
ამის შესახებ Politico წერს.
აშშ-ის დაზვერვის ხელმძღვანელმა სამშაბათს მოსკოვში ვიზიტი ასევე გამოიყენა იმისთვის, რომ რუსეთისთვის ირანის სამხედრო და ეკონომიკური მხარდაჭერის შემცირებისკენ მოეწოდებინა. ამის შესახებ ანონიმურმა წყარომ და დეტალების შესახებ ინფორმირებულმა ბრიტანელმა მაღალჩინოსანმა განაცხადეს.
ბოლო კვირებში რუსეთმა არაერთი გააჟღერა მუქარა უკრაინის მხარდამჭერი ნატო-ს წევრი ქვეყნების მისამართით, რამაც გააჩინა შეშფოთება, რომ მოსკოვმა შესაძლოა ჰიბრიდული ომის ახალი აგრესიული ზომები ან ნატო-ს მოკავშირეების წინააღმდეგ შეზღუდული სამხედრო მოქმედებები გამოიყენოს.
„მისი შეხვედრის მთავარი მიზანი იყო რუსეთის გაფრთხილება, რომ ბალტიისპირეთის ქვეყნების წინააღმდეგ ნებისმიერი ისეთი ქმედება დაუშვებელია, რომელმაც შესაძლოა კონფლიქტის ესკალაცია გამოიწვიოს“, – განაცხადა საკითხის შესახებ ინფორმირებულმა წყარომ.
მანამდე, The Wall Street Journal-მა გაავრცელა ინფორმაცია, რომ რეტკლიფმა მოსკოვში ვიზიტისას რუსეთი გააფრთხილა, არ დაესხას თავს ნატო-ს წევრ ქვეყნებს, თუმცა გამოცემას დამატებითი დეტალები არ დაუკონკრეტებია.
ოთხშაბათს დილით, რადიოინტერვიუში, ტრამპმა უარყო ვარაუდი, რომ რეტკლიფი მოსკოვში ჩავიდა იმისთვის, რომ პუტინი გაეფრთხილებინა, არ გამოეცდა ნატო-ს სიმტკიცე და არ დასხმოდა თავს დიდ ბრიტანეთს, რომელმაც ამ კვირაში უკრაინის მხარდაჭერის გაძლიერების პირობა დადო.
ტრამპმა ვიზიტს „რუტინული“ უწოდა, თუმცა აღიარა, რომ მისი ერთ-ერთი მიზანი ომის დასრულება იყო.
„არ მინდა ხალხი გავაწბილო. ჩვენ გვინდა, რომ უკრაინაში ომი დასრულდეს“, - განაცხადა მან.
კრემლში განაცხადეს, რომ CIA-ის დირექტორის ვიზიტი რუსეთისა და აშშ-ის სპეცსამსახურებს შორის კონტაქტებს უკავშირდებოდა. მათი განცხადებით, რეტკლიფს ვლადიმირ პუტინთან შეხვედრა არ ჰქონია, თუმცა რუსეთის პრეზიდენტს ვიზიტის შედეგების შესახებ აცნობეს.
გამოცემა აღნიშნავს, რომ 2021 წლის ბოლოს აშშ-ის მაშინდელი პრეზიდენტის, ჯო ბაიდენის, დაზვერვის ხელმძღვანელმა ბილ ბერნსმა რუსეთის პრეზიდენტ ვლადიმირ პუტინს უკრაინაში შეჭრის საფრთხის შესახებ გააფრთხილა. სამი თვის შემდეგ რუსეთის ჯარებმა უკრაინის საზღვარი გადაკვეთეს.
