აშშ-ის სახელმწიფო მდივანმა მარკო რუბიომ რამდენიმე უცხოელ კოლეგას განუცხადა, რომ აშშ უახლოეს პერიოდში ირანზე ახალი დარტყმების განხორციელებას არ გეგმავს და ყურადღებას ზეწოლის სხვა საშუალებებზე გადაიტანს.
ამის შესახებ Axios წყაროებზე დაყრდნობით იუწყება.
რუბიომ რამდენიმე მოკავშირე ქვეყნის საგარეო საქმეთა მინისტრს აცნობა, რომ აშშ მიიჩნევს, საზღვაო ბლოკადა ირანზე სულ უფრო ძლიერ ზეწოლას ახდენს, მაშინ როდესაც ჰორმუზის სრუტეში სულ უფრო დიდი მოცულობის ნავთობი გადის.
აღნიშნული გადაწყვეტილება შესაძლოა მიანიშნებდეს, რომ პრეზიდენტ დონალდ ტრამპს ომი მობეზრდა და სურს, რომ ის დასრულდეს, ყოველ შემთხვევაში, ამ ეტაპზე.
ამერიკელი მაღალჩინოსნის განცხადებით, რუბიომ მკაფიოდ მიანიშნა, რომ აშშ ფართომასშტაბიან სამხედრო ოპერაციებზე დაბრუნებას არ გეგმავს. თუმცა, დარტყმების განხორციელების შესაძლებლობა რჩება იმ შემთხვევაში, თუ ირანი თავად დაარტყამს აშშ-ს.
კიდევ ერთი ამერიკელი მაღალჩინოსნის თქმით, ჰორმუზის სრუტის ამერიკული საზღვაო ძალების მიერ განაღმვა ომში გარდამტეხი მომენტია, რადგან ამან მნიშვნელოვნად გაანეიტრალა ირანის გავლენის ერთ-ერთი მთავარი წყარო.
წყაროების ინფორმაციით, რუბიომ რამდენიმე კოლეგასთან სატელეფონო საუბრისას ტრამპის ადმინისტრაციის ირანის მიმართ ამჟამინდელი პოლიტიკის ძირითადი მიმართულებები ჩამოაყალიბა:
ირანის წინააღმდეგ სამხედრო მოქმედებების თავიდან აცილების მცდელობა;
ირანზე ეკონომიკური ზეწოლის გაძლიერება აშშ-ის საზღვაო ბლოკადისა და სანქციების ახალი პაკეტის მეშვეობით;
სრუტის გავლით რაც შეიძლება მეტი ნავთობის მსოფლიო ენერგეტიკულ ბაზრებზე გატანის უზრუნველყოფა.
ამასთან, აშშ-ის ერთ-ერთმა მაღალჩინოსანმა განაცხადა, რომ, როგორც მოსალოდნელია, ეს პოლიტიკა სულ მცირე შუალედური არჩევნების დასრულებამდე შენარჩუნდება. არჩევნების შემდეგ კი შესაძლოა კვლავ განიხილონ ახალი სამხედრო კამპანიის დაწყების შესაძლებლობა.
