ვერბიეს მუსიკალური ფესტივალის აკადემიის უმაღლესი ჯილდო - Prix Yves Paternot - ქართველ სოპრანოს, ანა ონიანს გადაეცა. ეს ჯილდო ყოველწლიურად გადაეცემა აკადემიის ყველაზე წარმატებულ და პერსპექტიულ ახალგაზრდა მუსიკოსს.

ანა ონიანმა ფესტივალზე ვერდის ოპერაში „ტრავიატა“ ვიოლეტას პარტია შეასრულა, რომელიც აკადემიის საოპერო სახელოსნომ (Atelier Lyrique) ფესტივალის ახალგაზრდულ ორკესტრთან ერთად, ჯეიმს გაფიგანის დირიჟორობით წარადგინა.

პრიზი, რომელიც “ვერბიეს ფესტივალის მეგობრების” დამფუძNებლისა და ფესტივალის ფონდის საბჭოს ხანგრძლივი წევრის, ივ პატერნოს სახელს ატარებს, გამორჩეული საშემსრულებლო უნარებისა და პოტენციალის მქონე არტისტებს გადაეცემათ. ამავდროულად, პრიზი ასევე მოიცავს 10 000 შვეიცარულ ფრანკს, მოწვევას შემდეგი წლის ფესტივალზე გამოსასვლელად და 15,000 შვეიცარიულ ფრანკამდე დამატებით მხარდაჭერას არტისტული და პროფესიული განვითარებისთვის.

„აკადემია ჩემი ცხოვრების ერთ-ერთი ყველაზე შთამაგონებელი გამოცდილება იყო. ასეთ არაჩვეულებრივ პედაგოგესა  და კოლეგებთან მუშაობა და ვერბიეში ამ როლის შესრულება ჩემი ოცნება გახლდათ. Prix Yves Paternot-ის მიღება წარმოუდგენელი პატივი და დიდი სტიმულია, როდესაც ჩემი კარიერის შემდეგ ეტაპს ვიწყებ“, - განაცხადა ონიანმა.

ანა ონიანმა 2024 წელს თბილისის სახელმწიფო კონსერვატორია დაამთავრა. 2025 წელს იგი პარიზის ეროვნული ოპერის აკადემიას შეუერთდა.

ვერბიეს მუსიკალური ფესტივალი ყოველწლიურად იმართება ვერბიეში, შვეიცარიაში. წელს ფესტივალი 16 ივლისს დაიწყო და 2 აგვისტომდე გაგრძელდა.