რუსეთის პრეზიდენტმა ვლადიმირ პუტინმა განაცხადა, რომ გაეცნო უკრაინის პრეზიდენტის, ვოლოდიმირ ზელენსკის ღია წერილს, თუმცა მისი თქმით, ამ ეტაპზე ორმხრივი შეხვედრის გამართვის საფუძველს ვერ ხედავს.
სანკტ-პეტერბურგის საერთაშორისო ეკონომიკურ ფორუმზე გამოსვლისას პუტინმა აღნიშნა, რომ წერილი „უხეშობის ელემენტებს შეიცავს“ და, მისი შეფასებით, შესაძლო შეხვედრის ორგანიზებას ხელს არ უწყობს.
პუტინმა ასევე უპასუხა ზელენსკის განცხადებებს მისი ასაკისა და ხელისუფლებაში ხანგრძლივი ყოფნის შესახებ. მისი თქმით, მსოფლიოში ბევრი ლიდერია, რომლებიც მასზე უფროსები არიან და კვლავაც აქტიურად ასრულებენ საკუთარ მოვალეობებს.
„მგონია, რომ ჩემს ასაკში ბევრი სხვა პოლიტიკოსიც წარმატებით ასრულებს საკუთარ მოვალეობებს, ზოგიერთი მათგანი კი ჩემზე უფროსიც არის“, - განაცხადა პუტინმა.
ამასთან, რუსეთის პრეზიდენტმა ზელენსკის მოუწოდა, „არჩევნების არ შეეშინდეს, იმოქმედოს კონსტიტუციის ფარგლებში და არ მოახდინოს ხელისუფლების უზურპაცია“.
პუტინის თქმით, ვოლოდიმირ ზელენსკი მასთან შეხვედრას ერთ-ერთი რუსი ბიზნესმენის მეშვეობით ითხოვდა.
ამასთან, ვლადიმირ პუტინამ აღნიშნა, რომ შეხვედრაზე უარი არასდროს უთქვამს, თუმცა „ცარიელი საუბრების“ წინააღმდეგია.
გამოსვლის დასასრულს კი პუტინმა რუს სამხედროებს მიმართა:
„იმუშავეთ, ძმებო.“
შეგახსენებთ, ვოლოდიმირ ზელენსკიმ ვლადიმირ პუტინს ღია წერილით მიმართა და შეხვედრა შესთავაზა.
