უკრაინის პრეზიდენტმა ვოლოდიმირ ზელენსკიმ ევროკავშირის ლიდერებისთვის გაგზავნილ წერილში განაცხადა, რომ გერმანიის წინადადება უკრაინისთვის ევროკავშირში „ასოცირებული“ წევრის სტატუსის მინიჭების შესახებ „უსამართლოა“, რადგან ეს კიევს ევროკავშირში ხმის უფლებას არ მისცემს.
Reuters-ის ცნობით, გერმანიის კანცლერმა ფრიდრიხ მერცმა ადრე წამოაყენა იდეა, რომლის მიხედვითაც უკრაინა ევროკავშირის სხდომებში მონაწილეობის უფლებას მიიღებდა, თუმცა ხმის მიცემის გარეშე და ეს როგორც სრულფასოვან წევრობამდე შუალედური ეტაპი იქნებოდა.
22 მაისს, პარასკევს გაგზავნილ წერილში ზელენსკიმ აღნიშნა, რომ გასულ თვეში გამართული არჩევნების შემდეგ უნგრეთის პრემიერ-მინისტრ ვიქტორ ორბანის ჩამოშორებამ ევროკავშირში გაწევრიანების მოლაპარაკებებისთვის ახალი შესაძლებლობა შექმნა.
„უსამართლო იქნება, თუ უკრაინა ევროკავშირში იქნება წარმოდგენილი, მაგრამ ხმის უფლების გარეშე დარჩება. დროა წინ წავიდეთ უკრაინის სრულფასოვანი და შინაარსობრივი წევრობისკენ,“ განაცხადა ზელენსკიმ.
მან ასევე მადლობა გადაუხადა ევროპელ ლიდერებს ომის პერიოდში გაწეული მხარდაჭერისთვის და აღნიშნა, რომ უკრაინა მთელი ევროკავშირისთვის რუსეთის აგრესიისგან დაცვის ხაზს წარმოადგენს.
„ჩვენ ვიცავთ ევროპას – სრულად, არა ნაწილობრივ და არა სანახევრო ზომებით. უკრაინა იმსახურებს სამართლიან მიდგომას და თანასწორ უფლებებს ევროპაში“, – დასძინა უკრაინის პრეზიდენტმა.
წერილი ევროკავშირის საბჭოს პრეზიდენტ ანტონიო კოშტას, ევროკომისიის პრეზიდენტ ურსულა ფონ დერ ლაიენსა და კვიპროსის პრეზიდენტ ნიკოს ქრისტოდულიდესს გაეგზავნა.
