აშშ-ის პრეზიდენტი დონალდ ტრამპი აცხადებს, რომ იარაღის მიყიდვის შესახებ ტაივანის პრეზიდენტთან საუბარს გეგმავს.
ამის შესახებ Politico წერს.
გამოცემის შეფასებით, ტრამპის განცხადებებმა შესაძლოა გაართულოს ურთიერთობები ვაშინგტონსა და პეკინს შორის, რომლის გაუმჯობესებასაც აშშ-ის პრეზიდენტი ჩინეთში გასული კვირის ვიზიტის დროს ცდილობდა.
„მე მას დაველაპარაკები. ყველას ვესაუბრები. სიტუაციას ძალიან კარგად ვაკონტროლებთ“, - უთხრა ტრამპმა ჟურნალისტებს, როდესაც ჰკითხეს, აპირებს თუ არა ტაივანის პრეზიდენტთან კონტაქტს იარაღის გაყიდვის გადაწყვეტილების მიღებამდე.
ტრამპმა ასევე აღნიშნა, რომ „ტაივანის საკითხზე“ მუშაობას გააგრძელებენ, თუმცა დეტალებზე არ უსაუბრია.
აშშ-სა და ტაივანის ლიდერებს შორის პირდაპირი კონტაქტები 1979 წლიდან პრაქტიკულად არ არსებობს. როგორც მედია აღნიშნავს, ტრამპის ნებისმიერი ნაბიჯი, რომელიც ტაივანის ლიდერთან საუბარს გულისხმობს, პეკინის გაღიზიანებას გამოიწვევს, რადგან ჩინეთი ტაივანს საკუთარ ტერიტორიად მიიჩნევს. ჩინეთის პრეზიდენტმა, სი ძინპინმა ტრამპთან ბოლო შეხვედრისას მკაფიოდ აღნიშნა, რომ ტაივანი „ყველაზე მნიშვნელოვანი საკითხია“ ორ ქვეყანას შორის ურთიერთობებში.
