აშშ და ირანი ომის დასრულების შესახებ შეთანხმების მიღწევასთან უფრო ახლოს არიან. ამის ერთ-ერთი ნიშანია ის, რომ თეირანი, როგორც ჩანს, მზადყოფნას გამოთქვამს, განიხილოს ბირთვულ პროგრამასთან დაკავშირებული საკითხები, რომლებზეც მანამდე მოლაპარაკებებს არ თანხმდებოდა.
ამის შესახებ Bloomberg ინფორმირებულ წყაროებზე დაყრდნობით წერს.
წყაროს ცნობით, ირანი ბირთვულ საქმიანობასთან დაკავშირებით კატარის მიერ წარდგენილ წინადადებებს განიხილავს. კატარი ამ პროცესში მთავარ შუამავლად მოქმედებს.
წყაროს ინფორმაციით, თეირანი მზადყოფნას ავლენს, განიხილოს ბირთვულ პროგრამასთან დაკავშირებული ისეთი საკითხებიც, რომლებიც მანამდე მოლაპარაკებების საგანი არ ყოფილა.
ამასთან, აშშ-ის პრეზიდენტმა დონალდ ტრამპმა ცოტა ხნის წინ კატარის ლიდერთან სატელეფონო საუბარი გამართა, რომლის ერთ-ერთი მთავარი თემა დაძაბულობის განმუხტვის მცდელობები იყო.
კატარის ემირის, შეიხ თამიმ ბინ ჰამად ალ-თანის ადმინისტრაციის ცნობით, ტრამპმა და კატარის ლიდერმა განიხილეს დოჰას შუამავლობით კონფლიქტის მხარეებს შორის უთანხმოების მოგვარებისა და კონფლიქტის დასრულების შესახებ ყოვლისმომცველი შეთანხმების მიღწევის შესაძლებლობები.
შეგახსენებთ, რომ აშშ-ში შუალედურ არჩევნებამდე მედიაში გავრცელდა ინფორმაცია, რომ ვაშინგტონი და თეირანი შუამავლების ბოლო წინადადებებს განიხილავდნენ, რათა მხარეებს შორის არსებული უთანხმოება მოეგვარებინათ და ომის მორიგი რაუნდი თავიდან აეცილებინათ.
30 ოქტომბერს დონალდ ტრამპმა განაცხადა, რომ აშშ-ის ომი ირანთან მალე დასრულდებოდა, თუმცა არ დაუკონკრეტებია, როგორ აპირებდა ამის მიღწევას.
მანამდე მედიაში ასევე გავრცელდა ინფორმაცია, რომ ვაშინგტონმა სპარსეთის ყურის რამდენიმე არაბული ქვეყანა გააფრთხილა, შუალედური არჩევნების შემდეგ ირანის წინააღმდეგ მოკლე და ინტენსიური სამხედრო ოპერაციისთვის მომზადებულიყვნენ.
