აშშ-ის პრეზიდენტის სპეციალური წარმომადგენლები, სტივ უიტკოფი და ჯარედ კუშნერი, შესაძლოა, მალე“ მოსკოვში ჩავიდნენ უკრაინაში ომის მშვიდობიანი დარეგულირების საკითხზე მოლაპარაკებებისთვის. ამის შესახებ ვლადიმირ პუტინის თანაშემწემ, იური უშაკოვმა განაცხადა.
უშაკოვის თქმით, ვაშინგტონსა და მოსკოვს შორის სატელეფონო კონტაქტების აქტიურობა აჩვენებს, რომ აშშ-ს „უკრაინში კონფლიქტის დარეგულირების საკითხი არ მიუტოვებია“.
როგორც რუსული მედია წერს, უშაკოვმა აღნიშნა, რომ მოლაპარაკებების პროცესი თანმიმდევრულად ვითარდება და არ დაეთანხმა მოსაზრებას, თითქოს აშშ უკრაინის საკითხის გადაწყვეტას ჩამოშორდა.
ამასთან, უშაკოვი დარწმუნებულია, რომ მოლაპარაკებები გაგრძელდება მანამდე, ვიდრე უკრაინა კრემლის მოთხოვნას დონეცკისა და ლუჰანსკის ოლქებიდან უკრაინული ჯარების გაყვანის შესახებ არ შეასრულებს. მისი თქმით, უკრაინა საბოლოოდ ამ ტერიტორიებს დაუთმობს.
მანამდე ცნობილი გახდა, რომ აშშ უკრაინის საკითხზე მოლაპარაკებების დატოვებით დაიმუქრა, თუ პროცესში პროგრესი კვლავ არ იქნება. სახელმწიფო მდივანმა მარკო რუბიომ განაცხადა, რომ შეერთებული შტატები ცდილობდა მოლაპარაკებებში შუამავლის როლი ეთამაშა, თუმცა ამას კონკრეტული შედეგი არ მოჰყოლია.
რუბიომ ასევე აღნიშნა, რომ ამერიკა მზად არის მომავალშიც შეასრულოს ეს როლი, თუმცა მხოლოდ იმ შემთხვევაში, თუ პროცესი რეალურად პროდუქტიული იქნება.
