გერმანიაში, ნიურნბერგში, საერთაშორისო გამოფენაზე „ბიოპროდუქცია 2011" საქართველოს მხოლოდ ერთი კომპანია „საქართველოს ეთერზეთები" წარმოადგენს. გამოფენაში, 850 ქვეყანის 2500-ზე მეტი კომპანია მონაწილეობს.
კომპანიამ „საქართველოს ეთერზეთები" გამოფენაზე წარმოადგინა კულტურები, რომელიც მოყავს საქართველოში - ევკალიპტი, დაფნა, ლავანდა, მელისა, სალები და ვარდი. ასევე ექსტრაქტები - ფეიხუა და ლიმონი.
„მსოფლიო ბრუნვა ეკონომიკის ისეთ სფეროში როგორიცაა ბიოპროდუქცია წელიწადში 16 მილიარდზე მეტ დოლარს აღემატება. წლევანდელი გამოფენა უმნიშვნელოვანესი მოვლენაა. კომპანიებმა თავისი პროდუქცია 5000 კვ მეტრზე გამოფინეს. 40 ქვეყნის 1500 ჟურნალისტი ესწრება და აშუქებს ამ გრანდიოზულ ღონისძიებას. „საქართველოს ეთერზეთების" პროდუქციამ გამოფენაზე დიდი ინტერესი გამოიწვია. დავამყარეთ საქმიანი კავშირები და მივიღეთ შეკვეთები. ეს არის ძალიან კარგი შანსი, რომ გავაცნოთ მთელ მსოფლიოს საქართველოს პოტენციალი და ქვეყანა უმსხვილეს ექსპორტიორად ვაქციოთ, შევიტანოთ სოლიდური წვლილი ეკონომიკის განვითარებაში," - განაცხადა „საქართველოს ეთერზეტების" გენერალურმა დირექტორმა სებასტიან პოტიომკინმა.
„საქართველოს ეთერზეთები" 2010 წელს დაფუძნდა და ჩაქვში ფლობს 1000 ჰექტარ მიწას. ფირმას აქვს ექსტრაგირებისა და დისტილაციის თანამედროვე ტექნოლოგიები. კომპანიაში მუშაობს 150-ზე მეტი თანამშრომელი და უახლოეს მომავალში იგეგმება დამატებით 100 კაცის დასაქმება.
