"ენერგეტიკის სამინისტრომ ტბა ფარავანზე დაცული ტერიტორიის შექმნაზე უარი მხოლოდ იმიტომ განაცხადა, რომ ერთმანეთისგან ტბა და მდინარე ვერ გაარჩიეს", _ ამის შესახებ პარლამენტში, "ქრისტიან-დემოკრატებთან" შეხვედრაზე, ასოციაცია "მწვანე ალტერნატივის" წარმომადგენელმა ირაკლი მაჭარაშვილმა განაცხადა.
"საქართველოს უდიდეს ტბა ფარავანზე დაცული ტერიტორია უნდა შექმნილიყო, რომლისთვისაც გერმანიის მთავრობამ დაფინანსებაც კი გამოყო, მაგრამ ენერგეტიკის სამინისტრომ თქვა, რომ ფარავანზე ჰესს აშენებს, რის გამოც დაცული ტერიტორია ვერ შეიქმნება. ამ დროს კი არც ერთ სამინისტროში ერთი ადამიანიც კი არ აღმოჩნდა ეთქვა, რომ არსებობს მდინარე ფარავანი და ტბა ფარავანი და ეს ჰესიც ტბიდან 40 კილომეტრის დაშორებით, მდინარე ფარავანზე კეთდება", - აღნიშნა მაჭარაშვილმა.
მისი შეფასებით, გარემოს დაცვის სამინისტროს ეკონომიკისა და ენერგეტიკის სამინისტროებთან ვასალური დამოკიდებულება აქვს, რატომღაც ითვლება, რომ ყველაფერზე თავი უნდა დახარონ და მათ კვერი დაუკრან.
"გარემოს დაცვის სამინისტროში ეშინიათ, თუ რამეზე არ დაეთანხმებიან, სამსახურიდან გაუშვებენ. მისი დაშლის ერთ-ერთი ფაქტორიც სწორედ ვასალური დამოკიდებულება გახდა", - აღნიშნა მან.
