ისრაელის საჰაერო ძალებმა ღამით თეირანში ირანის ხელმძღვანელობის კომპლექსს დაარტყა. ინფორმაციას The Times of Israel თავდაცვის ძალებზე დაყრდნობით ავრცელებს.

ისრაელის თავდაცვის ძალების ცნობით, დაახლოებით 100-მა გამანადგურებელმა კომპლექსზე 250-ზე მეტი ბომბი ჩამოაგდო.

ისრაელის თავდაცვის ძალების ცნობით, კომპლექსში სამიზნე შენობებს შორის იყო ირანის პრეზიდენტის ბიურო, ირანის უმაღლესი ეროვნული საფრთხოების  საბჭოს შტაბ-ბინა, ირანის „ყველაზე მაღალი რანგის ფორუმის“ მიერ შეხვედრებისთვის განკუთვნილი ტერიტორია, ასევე „ირანის არმიის ოფიცრების მომზადების პუნქტი“.

„ტერორისტული რეჟიმის ხელმძღვანელობის კომპლექსი ირანში ერთ-ერთი ყველაზე დაცული აქტივია და თეირანის გულში მრავალ ქუჩას მოიცავს“, - აცხადებენ სამხედროები და მას „ირანის ტერორისტული რეჟიმის ყველაზე მნიშვნელოვან და ცენტრალურ შტაბ-ბინას“ უწოდებენ.

„ტერორისტული რეჟიმის ხელმძღვაბელობისა და უსაფრთხოების წარმომადგენლები ხშირად იკრიბებოდნენ ტერიტორიაზე და იქიდან, სხვა საკითხებთან ერთად, ირანის ბირთვულ პროგრამასთან და ისრაელის სახელმწიფოს განადგურების გეგმის წინსვლასთან დაკავშირებულ სიტუაციას აფასებდნენ“, - ნათქვამია ისრაელის თავდაცვის ძალების განცხადებაში.