ორგანიზაცია „რუსთაველის გამზირის“ ლიდერმა, პაატა ბურჭულაძემ თავისუფლების მოედანზე სიტყვით გამოსვლისას „4 ოქტომბრის ეროვნული კრების დეკლარაცია“ წაიკითხა.

„ჩვენ, საქართველოს მოქალაქეები, შეკრებილნი ეროვნულ კრებაზე, ვაცხადებთ, ჩვენი სამშობლო აღმოჩნდა მიტაცებული. ე.წ. ხელისუფლებამ დაკარგა ხალხის ნდობა, სახელმწიფო ინსტიტუტები აღარ ასახავს ქართველი ხალხის ნებას. საქართველოს კონსტიტუცია ამბობს, სახელმწიფოს, ხელისუფლების წყარო არის ხალხი.  დღეს ხალხი იბრუნებს საკუთარ ძალაუფლებას უკან უზურპატორისგან, რათა დაიცვას მშვიდობა, უსაფრთხოება და ეროვნული ინტერესები. ბიძინა ივანიშვილის არაფორმალურმა მმართველობამ შექმნა რეალური საფრთხე საქართველოს სუვერენიტეტისთვის, თითოეული მოქალაქისთვის.

ყოველივე ზემოთ თქმულისგან გამომდინარე, კენსჭისყრაზე ვაყენებთ შემდეგ საკითხს:

ეროვნული კრება აცხადებს, ძალაუფლება მთლიანად ეკუთვნის ქართველ ხალხს;

ეროვნული კრება აცხადებს, რომ ე.წ. ხელისუფლებას 26 ოქტომბრის გაყალბებული არჩევნების და საერთაშორისო არაღიარების შემდეგ, კონსტიტუციურად  დაკარგული აქვს ლეგიტიმაცია, ამიტომ მისი ძალაუფლება შეწყვეტილია.

მესამე – ეროვნული კრება აცხადებს მშვიდობიან, გარდამავალ პერიოდს, რომელიც უზრუნველყოფს ძალაუფლების მშვიდობიანად, საკუთარ ხელში აღებას, დემოკრატიული ინსტიტუტების გათავისუფლებას, ევროკავშირთან გაწევრიანებისთვის დიალოგის მყისიერად აღდგენას, ქვეყნის უსაფრთხოების და მშვიდობიანობის დაცვას“, – განაცხადა ბურჭულაძემ.

ამასთან, პაატა ბურჭულაძემ შეკრებილებს მიმართა, ხმა მისცენ ძალიან მნიშვნელოვან საკითხს იმ ადამიანებზე, ვინც, მისი თქმით, ქვეყანა ამ მდგომარეობამდე მიიყვანა.

„ხმა უნდა მივცეთ ერთ ძალიან მნიშვნელოვან საკითხს. ჩვენ, როგორც პირველი გადაწყვეტილება უნდა მივიღოთ ექვს „ოცნების“ წევრ ადამიანზე, ვინ არიან მთავარი ბოროტმოქმედები ჩვენს ქვეყანაში, აქამდე რომ მოგვიყვანეს და მოვითხოვოთ მათი სასწრაფოდ დატყვევება და მიყვანა საპყრობილეში: ირაკლი კობახიძე, შალვა პაპუაშვილი, ანზორ ჩუბინიძე, მამუკა მდინარაძე, თეა წულუკიანი, ბიძინა ივანიშვილი“, – განაცხადა ბურჭულაძემ.