აშშ-ის სახელმწიფო მდივანმა, მარკო რუბიომ განაცხადა, რომ ამერიკის დახმარების გარეშე უკრაინას, როგორც სუვერენულ სახელმწიფოს, შესაძლოა აღარ ეარსება. მისი თქმით, ეს შეფასება აშშ-ის სხვადასხვა ადმინისტრაციის, მათ შორის დონალდ ტრამპის ადმინისტრაციის დროს გაწეულ მხარდაჭერასაც ეხება.
„აშშ-ის დახმარება რომ არა, მათ შორის ტრამპის ადმინისტრაციის დროს გაწეული მხარდაჭერა, დღეს უკრაინა აღარ იარსებებდა. უკრაინა, როგორც სუვერენული სახელმწიფო, აღარ იარსებებდა“, - განაცხადა რუბიომ ინდოეთში ჟურნალისტებთან საუბრისას.
სახელმწიფო მდივანმა ეს განცხადება უკრაინისა და აშშ-ის ურთიერთობებში დაძაბულობის ფონზე გააკეთა. ბოლო პერიოდში უთანხმოება გაღრმავდა უკრაინის სამხედრო მხარდაჭერის, სადაზვერვო ინფორმაციის გაცვლისა და SpaceX-ის სატელიტური კავშირის, Starlink-ისა და Starshield-ის გამოყენების საკითხებზე.
„ამ საკითხზე თავდაცვით პოზიციაში ყოფნას აღარ ვაპირებთ. შეერთებული შტატების დახმარება რომ არა, მათ შორის, ტრამპის ადმინისტრაციის დროს გაწეული მხარდაჭერა, დღეს უკრაინა აღარ იარსებებდა. უკრაინა, როგორც სუვერენული სახელმწიფო, აღარ იარსებებდა. ეს არ ნიშნავს, რომ უკრაინელი მებრძოლების სიმამაცე არ უნდა აღვნიშნოთ. ისინი საკუთარი ქვეყნისთვის მართლაც დიდი სიმამაცით იბრძოდნენ და ამერიკული დახმარებით გამორჩეულ შედეგებს მიაღწიეს, როდესაც გაცილებით დიდ ქვეყანას დაუპირისპირდნენ. თუმცა, ნათლად უნდა ითქვას: დღეს უკრაინა არ იარსებებდა, რომ არა შეერთებული შტატების მიერ მისთვის გაწეული მრავალმილიარდიანი დახმარება, რომელიც ბაიდენის ადმინისტრაციის დროს დაიწყო და ტრამპის ადმინისტრაციის პირობებშიც გრძელდება“, – განაცხადა მარკო რუბიომ.
რუბიომ ასევე დადებითად შეაფასა აშშ-ის პრეზიდენტის სპეციალური წარმომადგენლის, სტივ უიტკოფისა და უკრაინის პრეზიდენტის, ვოლოდიმირ ზელენსკის შეხვედრა ოსლოში. მისი თქმით, საუბარი კონსტრუქციული იყო, ხოლო უიტკოფი შეხვედრის შედეგებს რუსეთის მხარეს გაუზიარებს, რათა მხარეებმა ომის დასრულების მიმართულებით პროგრესს მიაღწიონ.
ამასთან, რუბიომ უარყო ინფორმაცია, რომ აშშ-ის ადმინისტრაციამ უკრაინის სამხედროებისთვის Starlink-ის მუშაობის შეზღუდვა მოითხოვა. მისი განცხადებით, SpaceX კერძო კომპანიაა და აშშ-ის პრეზიდენტი მის გადაწყვეტილებებს ვერ განკარგავს.
