უნგრეთში ეროვნული ბანკის ყოფილ ხელმძღვანელს, გეორგ მატოლჩის, ფინანსური თაღლითობისა და ყალბი კერძო დოკუმენტის გამოყენების ეჭვით დააკავეს. მასთან ერთად საქმესთან დაკავშირებული სხვა პირებიც დააკავეს.
ინფორმაციას Reuters ავრცელებს. დაკავების შესახებ ინფორმაცია უნგრეთის პრემიერ-მინისტრმა პეტერ მადიარმაც გაავრცელა.
მატოლჩის ადვოკატის, პალ ბატკის განცხადებით, მის დაცვის ქვეშ მყოფს ედავებიან ფინანსურ თაღლითობას, რომელმაც მნიშვნელოვანი მატერიალური ზიანი გამოიწვია, ასევე ყალბი კერძო დოკუმენტის გამოყენებას. ადვოკატის ინფორმაციით, 21 ოქტომბერს მატოლჩის დაკითხვა იყო დაგეგმილი.
უნგრეთის ცენტრალური საგამოძიებო პროკურატურის განცხადებით, ცენტრალურ ბანკთან დაკავშირებული გამოძიების ფარგლებში რამდენიმე ადგილას კოორდინირებული საგამოძიებო მოქმედებები ჩატარდა. უწყებას მატოლჩის სახელი თავდაპირველ განცხადებაში არ დაუსახელებია.
გეორგ მატოლჩი უნგრეთის ეროვნულ ბანკს 2013 წლიდან 2025 წლამდე ხელმძღვანელობდა. მანამდე, 2010-2013 წლებში, ვიქტორ ორბანის მთავრობაში ეკონომიკის მინისტრის თანამდებობა ეკავა და ორბანის ერთ-ერთ ახლო ეკონომიკურ მოკავშირედ მიიჩნეოდა.
მისი ხელმძღვანელობის პერიოდში ცენტრალური ბანკის ფონდებისა და უძრავი ქონების ინვესტიციების გარშემო შესაძლო ფინანსური დარღვევების შესახებ ბრალდებები გაჩნდა. გასულ თვეში შეტანილი საჩივარი, სხვა საკითხებთან ერთად, თანხების მითვისებას, თაღლითობასა და თანამდებობის ბოროტად გამოყენებას ეხებოდა.
ამ ეტაპზე ოფიციალურად არ დადასტურებულა, უკავშირდება თუ არა მატოლჩის დაკავება უშუალოდ უძრავი ქონების გარიგებებს ან ცენტრალური ბანკის ფონდებს. მატოლჩი წარსულში ბრალდებებს უარყოფდა.
