21 ოქტომბერს კიევის სვიატოშინის რაიონში საცხოვრებელ კორპუსზე რუსეთის თავდასხმას ორი ადამიანი ემსხვერპლა, ერთი კი დაშავდა. დაღუპულთა ცხედრები მაშველებმა ნანგრევების გაწმენდისას აღმოაჩინეს. ინფორმაციას უკრაინული მედია ავრცელებს.
უკრაინის საგანგებო სიტუაციების სახელმწიფო სამსახურის ინფორმაციით, დილის თავდასხმის შედეგად მაღალსართულიანი საცხოვრებელი სახლის მე-20 სართულზე მდებარე ბინაში ხანძარი გაჩნდა. ცეცხლი დაახლოებით 70 კვადრატულ მეტრზე გავრცელდა, ბინის კონსტრუქციები კი ნაწილობრივ დაინგრა.
ნანგრევების გაწმენდისას მაშველებმა ორი ადამიანის ცხედარი აღმოაჩინეს.
უკრაინული ენერგეტიკული კომპანია DTEK-ის ცნობით, რუსეთის თავდასხმის შედეგად კიევის სვიატოშინის რაიონში ელექტროენერგიის ავარიული გათიშვა დაფიქსირდა. ენერგეტიკოსები ელექტრომომარაგების აღდგენაზე მუშაობენ.
უკრაინის დედაქალაქის სხვა რაიონებში ელექტროენერგიის გათიშვა დადგენილი გრაფიკის მიხედვით მიმდინარეობს.
