პალესტინის ავტონომიის პრეზიდენტმა მაჰმუდ აბასმა გაერო-ს გენერალურ ასამბლეაზე ვიდეომიმართვისას განაცხადა, რომ „ჰამასი“ არანაირ როლს არ შეასრულებს პალესტინის მომავალ მმართველობაში.
პალესტინის ავტონომიის დელეგაციას აშშ-მა უარი უთხრა ვიზების გაცემაზე, რის გამოც მაჰმუდ აბასს სიტყვით გამოსვლა ვიდეოზარის მეშვეობით მოუწია.
თავის გამოსვლაში მან გამოკვეთა ღაზის ომისშემდგომი მომავალი სტრუქტურის გეგმები.
მისი გამოსვლის მთავარი თეზისი სრული დემილიტარიზაციისა და „ჰამასის“ ხელისუფლებიდან ჩამოშორების მოთხოვნა იყო.
„ჰამასი“ მმართველობაში არანაირ როლს არ ითამაშებს. „ჰამასმა“ და სხვა დაჯგუფებებმა იარაღი პალესტინის ხელისუფლებას უნდა ჩააბარონ“, - განაცხადა მან.
„ჩვენ გვინდა ერთიანი, სახელმწიფო იარაღის გარეშე, სახელმწიფო ერთიანი კანონით და ერთიანი, ლეგიტიმური უსაფრთხოების ძალებით. ჩვენ ვგმობთ ოკუპაციის დანაშაულებს.
ჩვენ ასევე ვგმობთ მშვიდობიანი მოსახლეობის მკვლელობებს და დაკავებებს, მათ შორის „ჰამასის“ ქმედებებს 2023 წლის 7 ოქტომბერს,“ - განაცხადა აბასმა.
თავისი გამოსვლის დასასრულს, აბასმა ცეცხლის შეწყვეტის შეთანხმების დამყარებიდან ერთი წლის განმავლობაში რეფორმების გატარებისა და დემოკრატიული არჩევნების გამართვის პირობა დადო.
მან აღნიშნა, რომ კენჭისყრა საერთაშორისო ზედამხედველობის ქვეშ ჩატარდება მისი გამჭვირვალობისა და ლეგიტიმურობის უზრუნველსაყოფად.
