ლიეტუვის საგარეო საქმეთა მინისტრი კესტუტის ბუდრისი მიიჩნევს, რომ ევროკავშირმა რაც შეიძლება მალე უნდა აამოქმედოს გეგმა B უკრაინასთან გაწევრიანების შესახებ მოლაპარაკებების დაწყებაზე უნგრეთის ვეტოს გამო.
ამის შესახებ ბუდრისმა „ევროპეისკა პრავდასთან“ ინტერვიუში განაცხადა.
შეკითხვაზე, არსებობდა თუ არა უკრაინის ევროპული ინტეგრაციის დაჩქარების გზა უნგრეთის ვეტოს გათვალისწინებით, მინისტრმა დადებითად უპასუხა.
მან აღნიშნა, რომ გაფართოების ნორმალური პროცესი ეფუძნება იმ პრინციპს, რომ ქვეყნის წინსვლა მის მიღწევებზეა დამოკიდებული და რომ ეს ახლა უნგრეთის გამო კითხვის ნიშნის ქვეშ დგება - რადგან უკრაინა აკმაყოფილებს კრიტერიუმებს, მაგრამ ბუდაპეშტი ვეტოს უფლებით მანიპულირებს.
„ჩვენი მიზანია 27 ხმის მოპოვება, მაგრამ ვიდრე ეს მოხდება, ალტერნატიულ გადაწყვეტილებებს ვეძებთ“, - აღნიშნა ბადრისმა.
მან დაადასტურა, რომ საუბარია ე.წ. გეგმა B უნგრეთის ვეტოს დასაძლევად.
„ჩვენ არ შეგვიძლია [უნგრეთის ვეტოს] მძევლები ვიყოთ და არსებობს გზები, რომლითაც წინსვლა შეგვიძლია. დანიის თავმჯდომარეობის დროსაც კი გვაქვს შესაძლებლობა და დრო, გადავიდეთ არაფორმალურ ეტაპებზე, რომლებიც ოფიციალურად ცოტა მოგვიანებით დასრულდება. გაფართოების ამჟამინდელი მეთოდოლოგია ასეთი მიდგომის საშუალებას იძლევა“, - აღნიშნა კესტუტის ბუდრისმა.
