გერმანია ოქტომბერში კოპენჰაგენში დაგეგმილ ევროკავშირის არაფორმალურ სხდომამდე გადაწყვეტს, დაუჭერს თუ არა მხარს ისრაელის წინააღმდეგ ევროკავშირის სანქციებს.
ამის შესახებ გერმანიის კანცლერმა ფრიდრიხ მერცმა მადრიდში ვიზიტის დროს განაცხადა. იუწყება Reuters
ესპანეთის პრემიერ-მინისტრ პედრო სანჩესთან ერთად საუბრისას მერცმა განაცხადა, რომ ისრაელის ქმედებები ღაზაში არ შეესაბამება მის გაცხადებულ მიზნებს, თუმცა ხაზგასმით აღნიშნა, რომ გერმანია არ იზიარებს იმ მოსაზრებას, რომ ეს ქმედებები გენოციდს წარმოადგენს.
მერცმა ასევე აღნიშნა, რომ მისი ქვეყნისთვის პალესტინის სახელმწიფოებრიობის აღიარება ჯერ განხილვის საგანი არ არის.
როგორც მედია აღნიშნავს, მერცის კომენტარები ხაზს უსვამს გერმანიის მზარდ მზადყოფნას, გააკრიტიკოს ისრაელი, მაგრამ ყოყმანობს, მიიღოს სადამსჯელო ზომები იმ ქვეყნის წინააღმდეგ, რომლის მიმართაც მისი მთავრობა განსაკუთრებულ პასუხისმგებლობას გრძნობს.
ევროკომისიამ ცოტა ხნის წინ შესთავაზა ღაზაში ომის გამო, დაახლოებით 5.8 მილიარდი ევროს ოდენობის ისრაელის ექსპორტის მოცულობის სავაჭრო შეთანხმების შეჩერება, თუმცა ამჟამად ამ ზომას არ აქვს საკმარისი მხარდაჭერა ევროკავშირის ქვეყნებს შორის.
„ამ კითხვებზე, რომლებზეც პასუხი ახლა ევროპულ დონეზეა საჭირო, გერმანიის მთავრობის საბოლოო გადაწყვეტიელბას უახლოეს დღეებში მიიღებს. ამ საკითხებს მომავალ კვირას ფედერალური კაბინეტის დონეზე კვლავ განვიხილავთ. ვვარაუდობ, რომ 1-ელ ოქტომბერს კოპენჰაგენში დაგეგმილ არაფორმალურ საბჭოს სხდომაზე გვექნება პოზიცია, რომელსაც მთელი გერმანიის მთავრობაც დაუჭერს მხარს“, - განაცხადა მერცმა.
გერმანია ამტკიცებს, რომ მას განსაკუთრებული ვალდებულება აქვს ისრაელის წინაშე ჰოლოკოსტზე მისი პასუხისმგებლობის გამო, თუმცა ეს პოზიცია ზეწოლის ქვეშაა ღაზაში არსებული ვითარების გამო ევროპის მზარდი შეშფოთების ფონზე.
