პოლონეთის პრემიერ-მინისტრმა დონალდ ტუსკმა განაცხადა, რომ შეერთებულმა შტატებმა პირობა დადო, რომ ევროპელ პარტნიორებთან კონსულტაციებს გამართავს აშშ-ის პრეზიდენტ დონალდ ტრამპსა და რუსეთის ლიდერ ვლადიმირ პუტინს შორის 15 აგვისტოს დაგეგმილ შეხვედრამდე. ამის შესახებ The Guardian იუწყება.
ტუსკმა აღნიშნა, რომ უკრაინის ტერიტორიული მთლიანობის შენარჩუნების მნიშვნელობა „არა მხოლოდ ჩვენი მეზობლის მიმართ სოლიდარობის, არამედ ჩვენივე უსაფრთხოების საკითხიცაა“.
ტუსკმა განაცხადებით, მას ტრამპისა და პუტინის შეხვედრასთან დაკავშირებით „ბევრი შიში და ბევრი იმედი“ აქვს, რადგაბ მისი თქმით, ტრამპის „ტაქტიკა, რომელიც ზოგჯერ არაპროგნოზირებადია, როდესაც საქმე სხვადასხვა ნაბიჯსა და მოქმედებას ეხება“.
მან თქვა, რომ პუტინის ზოგიერთი წინადადება ტერიტორიასთან დაკავშირებით „ცალმხრივი“ ჩანდა და „ძნელი გასაგები არ არის, თუ რატომ არის ეს მიუღებელი“ უკრაინისთვის.
მისი თქმით, ევროპელი ლიდერები „ერთსულოვანნი რჩებიან თავიანთ მიდგომებში“:
„პოლონეთისა და ჩვენი ევროპელი პარტნიორებისთვის ნათელი უნდა იყოს, რომ საზღვრების შეცვლა ძალის გამოყენებით არ შეიძლება და რუსეთს არ უნდა მიეცეს უკრაინაში შეჭრით მოგების მიღების უფლება.
დასავლეთი, მათ შორის ევროპული ქვეყნები, არ მიიღებს რუსეთის მოთხოვნებს, რომლებიც არსებითად უკრაინის ტერიტორიის მიტაცების ტოლფასია“, - აღნიშნა ტუსკმა.
ტუსკმა ასევე გააფრთხილა რუსეთი, რომ არ იფიქროს, რომ მას შეუძლია სხვა ქვეყნების საზღვრებისთვის დაუსჯელად დავა.
მისი თქმით, უკრაინის შესახებ არაფერი იქნება უკრაინის გარეშე.
„ისტორიამ იცის - და პოლონეთი ხშირად ყოფილა ამის მსხვერპლი - რომ როდესაც დიდი სახელმწიფოები სხვა ქვეყნებთან დაკავშირებით გადაწყვეტილებებს მოლაპარაკებებში ამ ქვეყნების მონაწილეობის გარეშე იღებდნენ, შედეგები სერიოზული იყო“, - დასძინა ტუსკმა.
