თურქეთში უკვე რამდენიმე დღეა ტყის ხანძრები მძვინვარებს.
25 ივლისიდან ცეცხლი ანტალიის პროვინციას მიუახლოვდა, სადაც ტურისტებში პოპულარული უამრავი კურორტი მდებარეობს.
თურქეთის ხელისუფლებამ კვირას, 27 ივლისს განაცხადა, რომ სანაპირო რეგიონებში ხანძრების ქრობის პროცესში პროგრესი შეინიშნება.
სტამბოლის სამხრეთით, ბურსას პროვინციაში ახალი ხანძრები დაფიქსირდა.
27 ივლისის დილით, თურქეთის სოფლის მეურნეობისა და სატყეო მეურნეობის მინისტრმა, იბრაჰიმ იუმაკლიმ, პრესკონფერენციაზე განაცხადა, რომ ხანძრების უმეტესობა კონტროლს ექვემდებარება, ზოგი კი ჯერ კიდევ მიმდინარეობს.
მისივე თქმით, ბოლო 24 საათის განმავლობაში, ქვეყნის მასშტაბით 84 კერა ჩააქრეს, რომელთაგან 36 ტყის ხანძარია.
„როგორც ჩანს, სიტუაცია ორ ან სამ დღეში არ დასრულდება“, - განაცხადა მინისტრმა და მოუწოდა თანამოქალაქეებს, ღია ცის ქვეშ ცეცხლი არ დანთონ.
ოფიციალური პირის თქმით, მერსინის სანაპირო პროვინციაში, ქალაქ სილიფკესთან და ანტალიის პროვინციაში, ქალაქ სერიკთან ახლოს გაჩენილი ხანძრები კონტროლს დაექვემდებარა.
ანტალიის პროვინციის სანაპირო ქალაქ გაზიფაშაში ხანძრის წინააღმდეგ ბრძოლა გრძელდება.
სტამბოლის სამხრეთით, სანაპირო პროვინცია ბურსაში, ასევე რამდენიმე შიდა რეგიონში ახალი ხანძრს კერები გაჩნდა.
თურქეთში ხანძრის გამო სულ 1500-ზე მეტი ადამიანია ევაკუირებული. მანამდე გავრცელდა ინფორმაცია, რომ ხანძრის ჩაქრობისას 10 მეხანძრე დაიღუპა.
მინისტრმა აღნიშნა, რომ ახლა მცირე ქარსაც კი შეუძლია დიდი ხანძრის გაღვივება, რადგან ქვეყანაში უკიდურესად მაღალი ტემპერატურა ფიქსირდება.
ანტალიაში - დღისით +35°C-მდე ტემპერატურა ფიქსირდება. თურქეთის ზოგიერთ რაიონში კი ტემპერატურამ +50°C-მს მიაღწია.