პარლამენტთან მიმდინარე საპროტესტო აქციების დროს ჯგუფურ ძალადობაში მონაწილეობის ბრალდებით დაკავებული გიორგი გორგაძე, რომელიც პროცესზე შეუძლოდ გახდა, ციხეში დააბრუნეს. ის სასჯელაღსრულების დაწესებულებაში საბადრაგო სამსახურმა გადაიყვანა.
გორგაძე შეუძლოდ პროცესის დაწყებისას გახდა. საჭირო გახდა სხდომის შეჩერება და მისთვის სასწრაფო დახმარების გამოძახება.
როგორ ადგილზე მყოფი მოქალაქეები ჰყვებიან, ის დარბაზში შემოსვლის მომენტშიც ცუდად გამოიყურებოდა. გორგაძის დედამ შვილთან მიახლოება მოინდომა, რისი საშუალებაც მანდატურებმა და ბადრაგებმა არ მისცეს. მან მოითხოვა ექიმი გამოეძახებინათ. ამის შემდეგ გორგაძე ბადრაგებმა დარბაზიდან გაიყვანეს.
გაირკვა ისიც, რომ დაკავებულს რამდენიმე დღის წინ ფილტვების ანთება ჰქონდა.
გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ. ხოლო ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.
