“ერთიანი ნაციონალური მოძრაობა” ევროპის სახალხო პარტიის ახალგაზრდული ფრთის – YEPP-ის (Youth of the European People’s Party) – რიგით მე-15 კონგრესზე ოფიციალურად გახდა პირველი ქართული პოლიტიკური პარტია, რომელმაც ორგანიზაციის სრულფასოვანი წევრის სტატუსი მოიპოვა. ამის შესახებ პარტიის წევრმა ლევან სანიკიძემ განაცხადა.

 “ახალგაზრდული ევროპის სახალხო პარტიის რიგით მე-15 კონგრესზე “ნაციონალური მოძრაობა” გახდა პირველი ქართული პარტია, რომელიც შეუერთდა ევროპის ყველაზე დიდ ახალგაზრდულ პოლიტიკურ ორგანიზაციას. ჩვენ გავხდით სრულუფლებიანი წევრები, ეს არის ძალიან დიდი წარმატება. შემდგომში ჩვენ მივიღებთ მონაწილეობას, როგორც სრულფასოვანი წევრები ევროპის სახალხო პარტიის ახალგაზრდული ორგანიზაციის ნებისმიერი გადაწყვეტილების პროცესში, სადაც უკვე იქნება ქართველი ახალგაზრდების ხმა წარმოდგენილი. მე დარწმუნებული ვარ, რომ ეს არ არის პირველი გარღვევა, რომელიც ჩვენი ორგანიზაციის მხრიდან იქნება გაკეთებული, მე მჯერა, რომ მოვა დრო, როდესაც სწორედ ქართველი ახალგაზრდები, ახალგაზრდა პოლიტიკოსები, რომლებიც ახლა ჩნდებიან ასპარეზზე, შეძლებენ და საქართველოს გახდიან ევროკავშირის სრულფასოვან წევრს, მაგრამ ეს ყველაფერი ხდება ნაბიჯ-ნაბიჯ და დარწმუნებულო ვარ, რომ ის უპრეცედენტო მხარდაჭერა, რომელიც დღეს ჩვენ დავიმსახურეთ, მთლიანად ქართულ საზოგადოებაზე და ახალგაზრდობაზე გავრცელდება და მე მჯერა, რომ დიახ, ქართველი ახალგაზრდების ადგილი არის მხოლოდ და მხოლოდ ევროკავშირში.” - განაცხადა ლევან სანიკიძემ