შეერთებულმა შტატებმა სავიზო სანქციები დაუწესა კუბელ თანამდებობის პირებს, მათ შორის რესპუბლიკის პრეზიდენტს, მიგელ დიას-კანელს და ორ მინისტრს - თავდაცვისა და შინაგან საქმეთა სამინისტროების ხელმძღვანელებს, ალვარო ლოპეს მიერასა და ლაზარო ალვარეს კასასს.
ამის შესახებ აშშ-ის სახელმწიფო მდივნის, მარკო რუბიოს განცხადებაშია ნათქვამი.
რუბიომ განაცხადა, რომ მაღალჩინოსნებს „ადამიანის უფლებების უხეშ დარღვევებში“ ადანაშაულებდნენ.
სანქციები უკავშირდება ოთხი წლის წინ კუბაში გამართულ ანტისამთავრობო საპროტესტო აქციებს, რომლებიც ყველაზე მასშტაბური იყო 1990-იანი წლების დასაწყისიდან.
2021 წლის ივლისში, სან ანტონიო დე ლოს ბანიოსში (ჰავანას სამხრეთით) დაიწყო პირველი მასობრივი საპროტესტო აქციები, რომლებიც სწრაფად გავრცელდა სხვა ქალაქებში, მათ შორის დედაქალაქში.
მომიტინგეები სკანდირებდნენ ლოზუნგებს: „თავისუფლება!“, „ძირს დიქტატურა!“, „სამშობლო და სიცოცხლე!“.
რუბიომ ისაუბრა ძალადობასა და რეპრესიებზე, რომლებსაც მომიტინგეები ხელისუფლების მხრიდან დაექვემდებარნენ.
მისი თქმით, 700-ზე მეტი ადამიანი კვლავ დაკავებულია და წამების ან არასათანადო მოპყრობის მსხვერპლია.
„კუბელი ხალხისა და კუნძულის პოლიტიკური პატიმრების მიმართ სოლიდარობის ნიშნად, შეერთებული შტატები რეჟიმის მთავარ ლიდერებს სანქციებს უწესებს“, - ნათქვამია რუბიოს განცხადებაში.
მან დააკონკრეტა, რომ ვაშინგტონი ასევე დააწესებს სავიზო შეზღუდვებს კუბელი მაღაჩინოსნებისთვის, მათ შორის მათთვის, ვინც პასუხისმგებელია მომიტინგეების დაკავებაზე.
