იშიმშილო იმიტომ, რომ ვიღაცამ არჩევნებში მონაწილეობა არ მიიღოს, ასეთი რამ დედამიწის ზურგზე არ მომხდარა - ახლა ველოდებით, ალბათ, ზურაბიშვილი დაიწყებს შიმშილობას, რომ შეწყვიტოს შიმშილობა ხოშტარიამ, მერე მელია დაიწყებს და ასე ექნებათ სერიალი, - ამის შესახებ „ხალხის ძალის“ დეპუტატმა, გურამ მაჭარაშვილმა განაცხადა, რითაც შეაფასა ოპოზიციონერი პოლიტიკოსის, ელენე ხოშტარიას განცხადება, რომ შიმშილობას შეწყვეტს, თუ ოპოზიცია შეთანხმდება და თვითმმართველობის არჩევნებში მონაწილეობას არ მიიღებს.
მისი თქმით, ოპოზიციაში ერთმანეთს ულტიმატუმის ენით ესაუბრებიან.
„ერთი საკითხია, რომ „ნაცმოძრაობა“ და მისი ფილიალები ერთიანობაზე ვერ თანხმდებიან და მეორე საკითხია, როცა ერთმანეთის მიმართ ულტიმატუმის ენით საუბრობენ, თან ისეთი მკაცრი და რთული ფორმებით, როგორიცაა შიმშილობა. შიმშილობა არის პროტესტის უკიდურესი ფორმა და აქ საუბარია იდეალებზე, იმაზე, რომ შენ გდევნიან, რომ საჯაროდ მიაწოდო ვინმეს ხმა, ვინმემ მოგაქციოს ყურადღება. შიმშილობის არსი რა არის?! რომ ვინმემ ყურადღება მოგაქციოს და იშიმშილო იმიტომ, რომ ვიღაცა გაერთიანდეს და ერთიანი პოლიტიკური სპექტრი შექმნას, იშიმშილო იმიტომ, რომ ვიღაცამ არჩევნებში მონაწილეობა არ მიიღოს, ასეთი რამ დედამიწის ზურგზე არ მომხდარა. ახლა ველოდებით ალბათ, ზურაბიშვილი დაიწყებს შიმშილობას, რომ შეწყვიტოს შიმშილობა ხოშტარიამ, მერე მელია დაიწყებს შიმშილობას, რომ ზურაბიშვილს ეტყვის, შენ არ იშიმშილო იმიტომ, რომ მერე შიმშილობა შეწყვიტოს ხოშტარიამ და ასე ექნებათ სერიალი. ეს ჩვენ გავლილი კინო გვაქვს. ეს არის რეალობა, მათი სახე,“ - განაცხადა მაჭარაშვილმა.
