არცერთი დიპლომატის საქმე არ არის და საერთაშორისო სამართლის დარღვევაა ადგილსამყოფელი ქვეყნის კანონმდებლის, მის მიერ მიღებული კანონების უსაფუძვლო კრიტიკა. ეს განცხადება, ცინიზმია, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
პაპუაშვილს კითხვა დაუსვეს საქართველოში შვედეთის საელჩოს განცხადებაზე, სადაც საელჩო აღნიშნავს, რომ შვედეთში უცხოური დაფინანსების შესაფასებლად სპეციალური გამოძიების თავმჯდომარის დანიშვნა და „უცხოური გავლენის გამჭვირვალობის“ კანონი ერთმანეთისგან მკვეთრად განსხვავდება.
„ზუსტად ეს არის, როცა საელჩო ცინიზმით არის დაკავებული. იმავე განცხადებაში თავს დაესხა საქართველოს პარლამენტს და მის მიერ მიღებულ კანონს, რაც ასევე ვენის კონვენციის დარღვევაა. არცერთი დიპლომატის საქმე არ არის და საერთაშორისო სამართლის დარღვევაა ადგილსამყოფელი ქვეყნის კანონმდებლის და მის მიერ მიღებული კანონების უსაფუძვლო კრიტიკა. ეს განცხადება, რა თქმა უნდა, ცინიზმია. შვედეთის საელჩო ამბობს, რომ შვედური კანონი, რომელიც უნდა მიიღონ, ეხება ექსტრემიზმისა და საბოტაჟის დაფინანსების აკრძალვას, მაშინ, როდესაც შვედეთის ხელისუფლების წევრი საქართველოში ახალისებდა ექსტრემიზმს, საბოტაჟს. გუშინ განმეორებით დავდე კიდეც ვიდეო. გვახსოვს, 11 ნოემბერს საქართველოს პარლამენტის წინ შვედეთის ხელისუფლების წევრი იდგა და მიმართავდა რადიკალურ ოპოზიციას, შემდეგ სატელევიზიო ჩართვაში რადიკალებს მოუწოდებდა პარლამენტის საბოტაჟისკენ, ექსტრემიზმისკენ, გამოსულიყვნენ ქუჩაში და გაემეორებინათ მაიდანი. ანუ, საქართველოში ყოფილიყო სისხლიანი პროცესები. სადმე გსმენიათ შვედეთის საელჩოს განცხადება, რომ ის არ იზიარებს, გმობს, ემიჯნება ამას, სხვა აზრი აქვს? – არა. რახან არ გმობს და არ ემიჯნება, ესე იგი, იზიარებს. აქედან გამომდინარე, როდესაც შვედეთის საელჩო თავად იზიარებს ექსტრემიზმისა და საბოტაჟის წახალისების მოწოდებებს, არასერიოზულია აბსოლუტურად ცინიკური განცხადებების გამოქვეყნება და საუბარი, თითქოს სხვა განზრახვები აქვთ შვედეთში. სხვათა შორის, შვედეთში ერთ-ერთი მიმართულება არის რელიგიურ ორგანიზაციებზე თავდასხმა. ადამიანის უფლებების კიდევ სხვა განზომილების დარღვევაა, როცა სამიზნეში ამოღებული ჰყავთ რელიგიური ორგანიზაციები. მგონი, ეს კიდევ ამძიმებს იმ მიზნებს, რაც შვედეთშია“, – განაცხადა შალვა პაპუაშვილმა.
