რუსული სახელმწიფო კომპანიის, "რუსეთის რკინიგზის" ყოფილი ხელმძღვანელი და რუსეთის პრეზიდენტის ვლადიმირ პუტინის ერთ-ერთი თანამოაზრე, საერთაშორისო სანქციების ქვეშ მყოფი ვლადიმირ იაკუნინი საქართველოში ისვენებს. ამის შესახებ ტელეკომპანია „ფორმულა“ იტყობინება.
ფორმულას ინფორმაციით, იაკუნინი გაჩერდა სიღნაღში, სასტუმროში, რომელიც ბიზნესმენ ვანო ჩხარტიშვილს ეკუთვნის. ჩხარტიშვილი პარტია "ქართულ ოცნებასთან" დაახლოებული ბიზნესმენია. გავრცელებული ცნობებით, იაკუნინმა სწორედ ამ სასტუმროში აღნიშნა თავისი შვილის, ანდრეი იაკუნინის, დაბადების დღე, სადაც დაახლოებით 200 სტუმარი იყო შეკრებილი.
ტელეკომპანიის ინფორმაციით, არხის კორესპონდენტმა ვლადიმირ იაკუნინს კახეთში, ბოდბის მონასტერში ესაუბრა. იაკუნინს დაუსვეს კითხვა ბიძინა ივანიშვილთან შესაძლო ურთიერთობის შესახებ, რაზეც მან უპასუხა, რომ ივანიშვილს არ იცნობს. რაც შეეხება ვლადიმირ პუტინთან მეგობრულ კავშირს, ყოფილმა მაღალჩინოსანმა ამ თემაზე კომენტარისგან თავი შეიკავა. ფორმულას ინფორმაციით, რუსი ბიზნესმენი მისი უსაფრთხოების სამსახურის წარმომადგენელთან ერთად გადაადგილდებოდა.
ვლადიმირ იაკუნინი არის "რუსეთის რკინიგზის" (RZD) ყოფილი პრეზიდენტი და 1996 წელს შექმნილი კოოპერატივის, „ოზეროს“ ერთ-ერთი დამფუძნებელი. მისი დამფუძნებლები ასევე იყვნენ ვლადიმირ პუტინი, იური კოვალჩუკი და ნიკოლაი შამალოვი. 2013 წელს ფრანგულმა გაზეთმა Le Monde-მა იაკუნინს უწოდა "პუტინის უახლოესი ადამიანი".
2014 წელს ყირიმის ანექსიის შემდეგ, იაკუნინი აშშ-ის სანქციების სიაში შევიდა. მოგვიანებით მის წინააღმდეგ მსგავსი ზომები მიიღეს ავსტრალიამ, კანადამ, დიდმა ბრიტანეთმა და უკრაინამ.
