ევროპული საბჭოს გადაწყვეტილებით, ევროპული მშვიდობის ფონდის სახსრებიდან მოლდოვის თავდაცვისუნარიანობის გასაძლიერებლად 60 მილიონი ევრო გამოიყოფა.
გავრცელებული პრესრელიზის თანახმად, 20 მილიონი ევრო მოხმარდება მოკლე რადიუსის საჰაერო თავდაცვის სისტემის მოდერნიზაციას, ხოლო 40 მილიონი ევრო მოლდოვის ქვეითი ჯარების მობილობის მხარდასაჭერად და საჰაერო თავდაცვასთან დაკავშირებული კონტროლის გასაძლიერებლად.
აღსანიშნავია, რომ 40 მილიონი ევროს გამოყოფა ჯერ კიდევ 7 აპრილს დამტკიცდა.
საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის კაია კალასის განცხადებით, ეს დახმარება მიზნად ისახავს მოლდოვის არმიის მოდერნიზებას და მისი თავდაცვისინარიანობის გაზრდას, მისი ნეიტრალიტეტის სრული პატივისცემით.
კალასის განცხადებით, 2021 წლიდან მოლოდვისთვის გაწეული დახმარება 200 მილიონ ევროს აღწევს.
23 აპრილს კაია კალასი პირველი ოფიციალური ვიზიტით ეწვია მოლდოვას ევროპული დიპლომატიის ხელმძღვანელის რანგში, რომლის დროსაც იგი შეხვდა ქვეყნის პრეზიდენტს მაია სანდუს, ასევე პრემიერ-მინისტრ დორინ რესიანს, ვიცე-პრემიერს და საგარეო საქმეთა მინისტრს მიჰაი პოპშოის.
"ევროკავშირსა და მოლდოვას შორის პარტნიორობა დღითიდღე ძლიერდება. ევროკავშირი სამშვიდობო პროექტია და ჩვენ გვინდა მშვიდობა. მოლდოველებს სურთ მშვიდობა, უკრაინელებს სურთ მშვიდობა, ევროპელებს სურთ მშვიდობა", - თქვა კალასმა.
