აშშ-ის პრეზიდენტის დონალდ ტრამპის ადმინისტრაციამ მოამზადა აღმასრულებელი ბრძანების პროექტი, რომელიც გულისხმობს აშშ-ს სახელმწიფო დეპარტამენტის რადიკალურ რეორგანიზაციას. ინფორმაციას The New York Times-ი ავრცელებს.
გამოცემის ინფორმაციით, პროექტი ითვალისწინებს მრავალი რეგიონალური ბიუროს ლიკვიდაციას და ოთხი „კორპუსის“ შექმნას - ევრაზიის, ახლო აღმოსავლეთის, ლათინური ამერიკისა და ინდო-წყნარი ოკეანის.
გარდა ამისა, გათვალისწინებულია დემოკრატიისა და ადამიანის უფლებების, ლტოლვილთა და მიგრაციის საკითხებზე მომუშავე ბიუროების, ასევე საერთაშორისო ორგანიზაციებთან თანამშრომლობის ბიუროს დახურვა.
The New York Times-ის ინფორმაციით, ერთ-ერთი ყველაზე რადიკალური ცვლილება აფრიკის საქმეთა ბიუროს გაუქმება იქნება. სანაცვლოდ, პროექტი ითვალისწინებს უფრო მცირე დირექტორატის შექმნას, რომელიც ყურადღებას გაამახვილებს რამდენიმე საკითხზე, მათ შორის ანტიტერორისტულ ოპერაციებზე და კრიტიკული ბუნებრივი რესურსების სტრატეგიულ მოპოვებასა და ვაჭრობაზე“.
გარდა ამისა, პროექტი ითვალისწინებს პირველ ოქტომბრამდე ყველა „მეორადი“ საელჩოსა და საკონსულოს დახურვას აფრიკის სუბსაჰარის რეგიონის ქვეყნებში.
გარდა ამ ცვლილებებისა, განკარგულების პროექტი ითვალისწინებს მასშტაბურ შემცირებას, როგორც სახელმწიფო დეპარტამენტის ცენტრალურ აპარატში, ასევე საზღვარგარეთ დიპლომატიურ მისიებში.
როგორც იუწყებიან, თეთრ სახლს ასევე სურს, საზღვარგარეთ დიპლომატიურ მისიებში დასაქმების მსურველთათვის გამოცდის გაუქმება და დასაქმების ახალი კრიტერიუმების დანერგვა, მათ შორის „პრეზიდენტის საგარეო პოლიტიკურ ხედვასთან შესაბამისობა“.
გარდა ამისა, აშშ-ს სახელმწიფო დეპარტამენტმა, პროექტის მიხედვით, მნიშვნელოვნად უნდა გააფართოვოს ხელოვნური ინტელექტის გამოყენება დოკუმენტების მომზადებაში, ასევე „პოლიტიკის შემუშავებისა და ანალიზისა“ და „ოპერაციული დაგეგმვისთვის“.
აშშ-ის სახელმწიფო მდივანმა მარკო რუბიომ სოციალურ მედიაში გააზიარა The New York Times-ის სტატია და მას "ყალბი ამბები" უწოდა.
