უკრაინის ელჩმა დიდ ბრიტანეთში, უკრაინის შეიარაღებული ძალების ყოფილმა მთავარსარდალმა ვალერი ზალუჟნიმ დაადასტურა, რომ 2022 წელს გერმანიაში, ვისბადენში შეიქმნა საიდუმლო შტაბი, სადაც უკრაინის სარდლობა ამერიკელ პარტნიორებთან ერთად გეგმავდა ოპერაციებს რუსული ჯარების წინააღმდეგ. ეს ინფორმაცია მანამდე New York Times-მა გამოაქვეყნა.
ფეისბუქზე ზალუჟნიმ დაწერა, რომ ვისბადენში შტაბი „ნამდვილად იქცა ჩვენს საიდუმლო იარაღად ჩვენს პარტნიორებთან ოპერაციების დაგეგმვისა და მათი განხორციელების საჭიროებების ჩამოყალიბებაში“.
იგი შეიქმნა უკრაინისთვის სამხედრო დახმარების მიწოდების კოორდინაციის ცენტრის საფუძველზე, რომელიც თავდაპირველად შტუტგარტში აშშ-ის ევროპული სარდლობის შტაბ-ბინაში იყო განთავსებული.
უკრაინამ პარტნიორებთან ერთად იგრძნო ოპერატიული შტაბის საჭიროება, რომელიც შეაფასებდა იარაღისა და აღჭურვილობის საჭიროებებს. ამიტომ, ლოჯისტიკური ცენტრის ბაზაზე შეიქმნა შტაბი, რომელსაც უნდა გაეანალიზებინა უკრაინის არმიის დაგეგმილი ოპერაციები და ჩამოეყალიბებინა მისი საჭიროებები.
ზალუჟნი წერს:
„ეს საკითხი განსაკუთრებით აქტუალური გახდა 2022 წლის ზაფხულში, როდესაც ჩვენმა პარტნიორებმა გამოთქვეს ეჭვი უკრაინის ფრონტზე გარკვეული ტიპის იარაღისა და საბრძოლო მასალის მიზანშეწონილობის შესახებ“.
ყოფილმა ხელმძღვანელმა გაიზიარა, რომ ვისბადენის შტაბმა დაგეგმა ოპერაციები, ჩაატარა საომარი თამაშები, ჩამოაყალიბა საჭიროებები უკრაინის შეიარაღებული ძალებისთვის და გადასცა ისინი შეერთებულ შტატებსა და ევროპის ქვეყნების დედაქალაქებში. ზალუჟნიმ მას "ჩვენს პარტნიორებთან ურთიერთობის შესანიშნავი მექანიზმი" უწოდა.
NYT-ის ცნობით, საიდუმლო პარტნიორობის ცენტრი მდებარეობდა აშშ-ოს არმიის გარნიზონში გერმანიაში, ვისბადენში.
ყოველ დილით ამერიკელი და უკრაინელი სამხედრო ოფიცრები ადგენდნენ სამიზნე პრიორიტეტებს, რომელიც მოიცავდა რუსულ დანაყოფებს, ტექნიკის ნაწილებს ან ინფრასტრუქტურას.
