ესტონეთის საგარეო საქმეთა მინისტრი მარგუს ცაჰკნა მიიჩნევს, რომ ევროკავშირი ახლოსაა უნგრეთისთვის ევროკავშირის საბჭოში ხმის მიცემის უფლების ჩამორთმევასთან იმის გამო, რომ იგი ბლოკავს რუსეთის შესახებ გადაწყვეტილებებს.
ცაჰკნა აღნიშნავს, რომ მთელ ევროპაში სულ უფრო მეტად აცნობიერებენ, რომ რუსეთი სერიოზულ საფრთხეა და აუცილებელია დაუყოვნებლივ შეიარაღება.
ამასთან, უარყო არგუმენტები კონტინენტის სავარაუდო დაყოფის შესახებ.
„მოდით ვიყოთ გულწრფელები: იმისათვის რომ მოხდეს გაყოფა, საჭიროა ორი დიდი მხარის არსებობა. უნგრეთთან დაკავშირებით, ჩვენ გვაქვს ძალიან სუსტი ქვეყანა, რომელიც პუტინის გუნდის ნაწილია და ჩვენს ევროპულ გუნდში არა“, - აღნიშნა მან.
ესტონეთის საგარეო საქმეთა მინისტრმა აღნიშნა, რომ ახლა უნგრეთს შეუძლია დაბლოკოს ერთსულოვანი გადაწყვეტილებები, მაგალითად, ევროპის საგარეო და უსაფრთხოების პოლიტიკაზე.
"თუმცა, ევროკავშირის ხელშეკრულების მე-7 მუხლი საშუალებას იძლევა წევრ სახელმწიფოს ჩამოერთვას ხმის უფლება, თუ მისი წევრობა საფრთხეს უქმნის ევროპისა და სხვა წევრების უსაფრთხოებას. სწორედ ამას აკეთებს ორბანი", - განმარტა ცაჰკნამ.
მისი აზრით, მე-7 მუხლის გამოყენების შესაძლებლობა „უფრო და უფრო ახლოვდება“.
ევროკავშირის ხელშეკრულების მე-7 მუხლი ითვალისწინებს წევრი სახელმწიფოს გარკვეული უფლებების შეჩერებას, თუ ადგილი აქვს წევრი სახელმწიფოს მხრიდან ევროკავშირის ფუნდამენტური ფასეულობების სერიოზულ და მუდმივ დარღვევას.
