აშშ-ში ჰუმანიტარული პროგრამით მყოფ რამდენიმე უკრაინელს შეცდომით გაეგზავნა შეტყობინება, რომ ემიგრანტის სტატუსი გაუუქმდათ და მათ აქვთ შვიდი დღე ქვეყნის დასატოვებლად. ამის შესახებ სააგენტო Reuters იუწყება.
გარდა გზავნილისა, რომ მათ სტატუსს გაუუქმებენ, შეტყობინებაში აღინიშნული იყო, რომ თუ ისინი არ დატოვებდნენ შეერთებულ შტატებს მითითებულ ვადაში, „ფედერალური მთავრობა მათ იპოვიდა“.
„თუ თქვენ დაუყოვნებლივ არ დატოვებთ შეერთებულ შტატებს, შესაძლოა თქვენს წინააღმდეგ მიღებული იქნას სამართალდამცავი მოქმედებები, რაც გამოიწვევს თქვენს გაძევებას ქვეყნიდან“, - ნათქვამი იყო შეტყობინებაში.
მაგრამ შეერთებული შტატების საშინაო უსაფრთხოების დეპარტამენტის წარმომადგენელმა პარასკევს განაცხადა, რომ წერილი შეცდომით იქნა გაგზავნილი და რომ ჰუმანიტარული პროგრამა უკრაინელებისთვის, რომელიც შეიქმნა 2022 წელს რუსეთის მიერ ქვეყანაში შეჭრის შემდეგ, არ შეწყვეტილა.
გამოცემა წერს, რომ უცნობია რამდენმა უკრაინელმა მიიღო ასეთი წერილი.
