უკვე 10-12 ქვეყანამ გამოთქვა მზადყოფნა შეუერთდეს უკრაინაში სამხედრო კონტინგენტის ფორმირებას ომის დასრულების შემდეგ შემაკავებელი ძალების განლაგების ფარგლებში.
ამის შესახებ ჟურნალისტებთან შეხვედრისას უკრაინის პრეზიდენტის ოფისის ხელმძღვანელის მოადგილემ პავლო პალისამ ისაუბრა.
„ერთადერთი საკითხია, რა ფორმატში განხორციელდება ეს, ამიტომაც ახლა მიმდინარეობს დისკუსიები: არის ჩვენი ძირითადი ხედვა და არის ჩვენი პარტნიორების ხედვა, მათი შესაძლებლობებიდან გამომდინარე. მას შემდეგ, რაც ყველა დეტალი იქნება შეთანხმებული, შეგვიძლია გადავიდეთ უფრო შინაარსობრივ საუბარზე“, - აღნიშნა მან.
პალისას თქმით, უპირველეს ყოვლისა, მიმდინარეობს მოლაპარაკებები საფრანგეთთან და დიდ ბრიტანეთთან, რომლებმაც გამოთქვეს მზადყოფნა, ლიდერები იყვნენ ამ პროცესში.
ამასთან, როგორც მან დასძინა, საუბარია ბალტიისპირეთის და ჩრდილოეთ ევროპის ქვეყნების მონაწილეობაზეც.
პალისამ აღნიშნა, რომ უკრაინაში გენერალური შტაბის სამხედრო წარმომადგენლების შეხვედრა „მსურველთა კოალიციის“ ფარგლებში გაიმართება.
ეს შეხვედრა შეეხება პრაქტიკულ სამხედრო დაგეგმვას, კერძოდ, კონტიგენტის ყოფნას.
„ამ შეხვედრაზე განვიხილავთ ჩვენს საერთო ხედვას შემდგომი ქმედებების შესახებ, მასში 100%-ით მონაწილეობას მიიღებენ საფრანგეთისა და დიდი ბრიტანეთის წარმომადგენლები.
შესაძლოა სხვა ქვეყნების წარმომადგენლებიც შეუერთდნენ... აღნიშნული შეხვედრა პირველია. უახლოეს მომავალში იგეგმება კიდევ ერთი - ამჯერად უფრო ტექნიკური ფორმატით. იქ, იმედი მაქვს, ყველა საკითხი უფრო ღრმად და დეტალურად იქნება განხილული“, - განმარტა პალისამ.
მისი თქმით, უკრაინას შესანიშნავად ესმის, რომ ასეთი გადაწყვეტილებების მისაღებად აუცილებელია როგორც სამხედრო, ისე პოლიტიკური კომპონენტების სინქრონიზაცია. მხოლოდ ამის შემდეგ იქნება შესაძლებელი წინ წაწევა.
„ნებისმიერ შემთხვევაში, ეს შეიძლება განხორციელდეს კოალიციის თითოეულ წევრ ქვეყანასთან ორმხრივი შეთანხმებებით. მაგრამ ეს უკვე ტექნიკური დეტალებია. ახლა მთავარია გვქონდეს პოლიტიკური ნება და სამხედრო შესაძლებლობები“, - განაცხადა პალისამ.
