ერთადერთი, რაც დამებლოკება, ეს არის სახელფასო ბარათი, მაგრამ ხელფასს რამენაირად ავიღებ, - ამის შესახებ სააპელაციო სასამართლოს მოსამართლემ, იუსტიციის უმაღლესი საბჭოს წევრმა, ლევან მურუსიძემ "TV პირველთან" საუბარში დიდი ბრიტანეთის მიერ მის მიმართ სანქციების დაწესებასთან დაკავშირებით განაცხადა.
"ერთადერთი, რაც დამებლოკება, ეს არის სახელფასო ბარათი, მაგრამ ხელფასს რამენაირად ავიღებ. ვერ წარმომიდგენია, რომ ხელფასი ვერ ავიღო... სახელფასო ბარათი დამებლოკა, როდის დამებლოკა, რა მნიშვნელობა აქვს, დეტალებია ეს...
სიმართლე გითხრათ, მე დიდ ბრიტანეთში წასვლას არ ვაპირებ... არც ამერიკაში, რა თქმა უნდა, ვერ ჩავალ. ვივლი სოფელში ჩემთან, მზოვრში... მძიმე იქნება სანქციები, უფრო მძიმე და მტკიცე იქნება ჩემი პოზიცია, რომ არსად წასვლას არ ვაპირებ... ყველგან დავდიოდი, მაგრამ ახლა გადავწივიტე, რომ აღარსად აღარ ვიარო," - განაცხადა მურუსიძემ.
დღეს ცნობილი გახდა, რომ დიდი ბრიტანეთის მთავრობამ, კორუფციაში ჩართულობის ბრალდებით, თბილისის სააპელაციო სასამართლოს თავმჯდომარეს, მიხეილ ჩინჩალაძეს და სააპელაციო სასამართლოს მოსამართლეს, იუსტიციის უმაღლესი საბჭოს წევრს, ლევან მურუსიძეს სანქციები დაუწესა.
