დიდი ბრიტანეთის მთავრობის მიერ მიხეილ ჩინჩალაძისა და ლევან მურუსიძის დასანქცირება იმ პროცესის ნაწილია, რომელიც მიზნად ისახავს ჩვენი ქვეყნის საერთაშორისო იმიჯის დისკრედიტაციას, – ამის შესახებ „ქართული ოცნების“ წევრმა, ვლადიმერ ბოჟაძემ განაცხადა.
„დიდი ბრიტანეთის მთავრობის მიერ მიხეილ ჩინჩალაძისა და ლევან მურუსიძის დასანქცირება იმავე პროცესის ნაწილია, რომელიც მანამდეც იყო სხვა სახელმწიფოების მხრიდან, როდესაც მოსამართლეებზე იყო დაკისრებული სანქციები ყოველგვარი ახსნა-განმარტების გარეშე. იმ პროცესის ნაწილია, რომელიც მიზნად ისახავს ჩვენი ქვეყნის საერთაშორისო იმიჯის დისკრედიტაციას და, რაც ყველაზე მთავარია, ოპოზიციას აძლევს საშუალებას, გამოიყენოს ასეთი გადაწყვეტილებები საკუთარი პოლიტიკური და ვიწროპარტიული მიზნებისთვის. ეს საკითხი გასარკვევია და უნდა ვიცოდეთ, რა მიზეზის გამო იყო ასეთი გადაწყვეტილებები მიღებული. თუმცა, როგორც წინა შემთხვევაში ვერ მოვისმინეთ ახსნა-განმარტება, ამის მიზეზი რა იყო, ალბათ ამ კონკრეტულ შემთხვევაშიც ასე იქნება“, – განაცხადა ვლადიმერ ბოჟაძემ.
