მიანმარში მომხდარი ძლიერი მიწისძვრების გამო, 6 რეგიონში საგანგებო მდგომარეობა გამოცხადდა. ინფორმაციას BBC ავრცელებს.
ვრცელდება ფოტოები მიანმარის დედაქალაქ ნაიპიდავიდან და სიდიდით მეორე ქალაქ მანდალაიდან, რომლებზედაც ჩანს დაზიანებული და დანგრეული შენობები და გზები.
მიანმარში 7,7 მაგნიტუდის სიმძლავრის მიწისძვრა მოხდა. ძლიერი ბიძგები იგრძნობოდა ტაილანდის დედაქალაქ ბანგკოკშიც.
აშშ-ის გეოლოგიური სამსახურის განცხადებით, მიწისძვრა 7,7 მაგნიტუდის სიმძლავრის იყო და მას ძლიერი ბიძგები მოჰყვა.
ეპიცენტრი ქალაქ მანდაილაიდან დაახლოებით 17 კილომეტრში იყო, სადაც მოსახლეობა 1,2 მილიონს შეადგენს.
ტაილანდის გარდა, მიწისძვრა იგრძნობოდა ჩინეთის სამხრეთ-დასავლეთ პროვინცია იუნანშიც.
პეკინის მიწისძვრის სააგენტოს თქმით, მიწისძვრის სიმძლავრე 7,9 მაგნიტუდა იყო.
