რუსეთში ენგელსის სტრატეგიულ სამხედრო აეროდრომზე მასირებული იერიშიდან ერთი კვირის შემდეგ, უკრაინული დრონებით თავდასხმა კვლავ განხორციელდა.
რუსული სამთავრობო საინფორმაციო Telegram -არხები Mash და SHOT იუწყებიან, რომ ენგელსის რაიონში რამდენიმე აფეთქება მოხდა.
მანამდე სარატოვის ოლქის გუბერნატორმა, სადაც ენგელსი მდებარეობს, გამოაცხადა დრონის თავდასხმის საფრთხე, Engels Online-ის Telegram-არხი კი იტყობინება, რომ ქალაქში საჰაერო განგაშის ხმა ისმოდა.
"როსავიაციის" განაცხადებით, სარატოვის აეროპორტი დახურა.
„სამოქალაქო თვითმფრინავების ფრენების უსაფრთხოების უზრუნველსაყოფად, სარატოვის აეროპორტში დილიდან შემოღებულ იქნა დროებითი შეზღუდვები თვითმფრინავების ჩამოსვლასა და გაფრენაზე“, - ნათქვამია რუსეთის სამოქალაქო ავიაციის სამსახურის ოფიციალურ განცხადებაში.
თავდასხმის შედეგებისა და მისი მოგერიების შესახებ ინფორმაცია ჯერჯერობით არ ვრცელდება.
20 მარტს ენგელსს თავს დაესხა ათობით უკრაინული დრონი. ადგილობრივმა ხელისუფლებამ მას ომის დაწყების შემდეგ ყველაზე მასირებული შეტევა უწოდა.
უკრაინის გენერალურმა შტაბმა განაცხადა, რომ 20 მარტს ენგელსის ბაზაზე თავდასხმის შედეგად განადგურდა ფრთოსანი რაკეტების მარაგი, რომლებსაც რუსები უკრაინის წინააღმდეგ იყენებენ.
