დონეცკის ოლქის ქალაქ დობროპილიაზე 7 მარტს მომხდარი თავდასხმის შედეგად 11 ადამიანი დაიღუპა, დაშავებულთა რაოდენობა 50-მდე გაიზარდა, დაღუპულთა შორის არის საგანგებო სიტუაციების სამსახურის თანამშრომელი.
ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვისას განაცხადა.
„ეს იყო ერთ-ერთი ყველაზე სასტიკი დარტყმა, კომბინირებული დარტყმა. დარტყმა სპეციალურად იყო გათვლილი მაქსიმალური ზიანის მიყენებისთვის. რაკეტები, ასევე „შაჰედი“, ქალაქის ცენტრალურ ნაწილს მოხვდა. დაზიანდა ცხრა საცხოვრებელი კორპუსი, ასევე სავაჭრო ცენტრი და მაღაზიები. სამწუხაროდ, თერთმეტი ადამიანი დაიღუპა. ვუსამძიმრებ ოჯახს და მეგობრებს. დაღუპულთა შორის იყო უკრაინის საგანგებო სიტუაციების სახელმწიფო სამსახურის თანამშრომელი.
მეორე დარტყმა მას შემდეგ განხორციელდა, რაც მაშველებმა მუშაობა დაიწყეს. დაშავდა 50 ადამიანი. ყველას გაუწიეს საჭირო დახმარება.
დაჭრილებს შორის შვიდი ბავშვია, უმცროსი გოგონა, 10 წლისაა“, - განაცახადა ზელენსკიმ.
ზელენსკიმ ხაზგასმით აღნიშნა, რომ რუსები „არ ფიქრობენ იმაზე, თუ როგორ დაასრულონ ომი, არამედ იმაზე, თუ როგორ მოახერხონ მეტის განადგურება და ხელში ჩაგდება, ვიდრე მსოფლიო მათ ამ ომის წარმოების უფლებას აძლევს“.
