უკრაინამ „დიდი შვიდეულის“ სესხის ფარგლებში, მიიღო პირველი ტრანში დიდი ბრიტანეთისგან, რომელიც უზრუნველყოფილია გაყინული რუსული აქტივებიდან მიღებული შემოსავლებით. ამის შესახებ უკრაინის პრემიერ-მინისტრმა დენის შმიჰალმა განაცხადა.
კიევმა მიიღო 752 მილიონი ფუნტი (დაახლოებით 971 მილიონი დოლარი).
შმიჰალმა განაცხადა, რომ თანხა მოხმარდება უკრაინის თავდაცვისუნარიანობის გაძლიერებას და მადლობა გადაუხადა G7-ის პარტნიორებს „იმ მექანიზმისთვის, რომელიც აიძულებს რუსული სახსრების მუშაობას უკრაინისთვის“. მისივე თქმით, კიევი მოელის, რომ რუსეთის ყველა სუვერენული აქტივი მომავალში ჩამოერთმევა და გადაეცემა უკრაინას.
„ჩვენ გამოვიყენებთ სახსრებს უკრაინის თავდაცვისუნარიანობის გასაძლიერებლად. მადლობას ვუხდი კირ სტარმერს, დიდი ბრიტანეთის მთავრობას და ჩვენს პარტნიორებს „დიდი შვიდეულიდან“ იმ მექანიზმისთვის, რომელიც აიძულებს რუსულ თანხებს, იმუშაონ უკრაინისთვის. იმედი გვაქვს, რუსეთის ფედერაციას ყველა სუვერენული აქტივი მომავალში ჩამოერთმევა და გადმოეცემა ჩვენს სახელმწიფოს“, – წერს დენის შმიჰალი.
