უკრაინის პრეზიდენტი, ვოლოდიმირ ზელენსკი FOX News-სთან ინტერვიუში აცხადებს, რომ უკრაინაზე მეტად ომის დასრულება არავის უნდა.
"არავის სურს [ომის დასრულება] ჩვენზე მეტად, რადგან ჩვენ ვართ ამ ომში, ამ ბრძოლაში, ეს არის ბრძოლა სიცოცხლისთვის, თავისუფლებისთვის", - თქვა მან.
ზელენსკიმ უპასუხა შეკითხვას, სურს თუ არა ბოდიში მოუხადოს დონალდ ტრამპს თეთრ სახლში ცხარე კამათის შემდეგ.
"არ ვარ დარწმუნებული, რომ რაიმე ცუდი დავაშავეთ. დემოკრატიისა და მედიის მიმართ მთელი პატივისცემით, ვფიქრობ, რომ მათ უნდა მოისმინონ უკრაინის პოზიცია."
მისივე შეფასებით, თეთრ სახლში კამათი კარგი არც ერთი მხარისთვის არ ყოფილა.
კითხვაზე, ნანობს თუ არა ზელენსკი მომხდარს, მან უპასუხა: „ვფიქრობ, ცუდი სიტუაცია იყო. მე ყოველთვის ღია ვარ მედიისთვის, მაგრამ ეს დახურულ კარს მიღმა უნდა მომხდარიყო. მე მინდა, რომ ჩვენმა პარტნიორებმა სწორად გაგვიგონ“.
ჟურნალისტის კითხვაზე, შეიძლება თუ არა ტრამპისა და მისი ურთიერთობა გამოსწორდეს, ზელენსკიმ უპასუხა:
„ვფიქრობ, ტრამპთან ჩემი ურთიერთობა შეიძლება გადარჩეს. ჩვენს ხალხს შორის ისტორიული ურთიერთობა ძლიერია. ეს ისტორიული, ძლიერი ურთიერთობაა ჩვენს ხალხებს შორის და სწორედ ამიტომ ვიწყებ ყოველთვის მადლობით თქვენი ხალხის მიმართ ჩვენი ხალხისგან.
რა თქმა უნდა, მადლობელი ვარ პრეზიდენტის და რა თქმა უნდა, მადლობელი ვარ კონგრესის, მაგრამ პირველ რიგში, მადლიერი ვარ თქვენი ხალხის. თქვენმა ხალხმა ჩვენი ხალხი გადაარჩინა", - თქვა ზელენსკიმ.
