საგარეო საქმეთა მინისტრი, მაკა ბოჭორიშვილი თურქეთის რესპუბლიკაში იმყოფება.
საგარეო უწყების განცხადებით, ბოჭორიშვილი თურქეთში საგარეო საქმეთა მინისტრის რანგში პირველი ოფიციალური ვიზიტის ფარგლებში გაემგზავრა.
26 თებერვალს, საგარეო საქმეთა მინისტრი მაკა ბოჭორიშვილი, თურქ კოლეგას - ჰაქან ფიდანს შეხვდა.
შეხვედრაზე მინისტრებმა განსაკუთრებით აღნიშნეს ორ ქვეყანას შორის არსებული მჭიდრო მეგობრული ურთიერთობები და სტრატეგიული პარტნიორობა.
მხარეებმა განიხილეს საქართველოსა და თურქეთის რესპუბლიკას შორის არსებული დინამიური დღის წესრიგის მნიშვნელოვანი საკითხები,მათ შორის პოლიტიკურ და ეკონომიკურ სფეროებში. ხაზი გაესვა მაღალი დონის სტრატეგიული პარტნიორობის საბჭოს ფორმატის გამოყენების მნიშვნელობასა და მაღალი და უმაღლესი დონის ვიზიტების გაცვლის აუცილებლობას.
ეკონომიკურ თანამშრომლობაზე საუბრისას აღინიშნა, რომ თურქეთი საქართველოს ნომერ პირველი სავაჭრო პარტნიორია და ამ მიმართულებით ხაზი გაესვა არსებული პოტენციალის მაქსიმალურად ათვისების მნიშვნელობას.
საგარეო საქმეთა მინისტრებმა ისაუბრეს რეგიონში არსებულ ვითარებასა და უსაფრთხოების გამოწვევებთან გამკლავების მიზნით ერთობლივი ძალისხმევის მნიშვნელობაზე. ამ
კონტექსტში, აღინიშნა თურქეთის, როგორც მნიშვნელოვანი რეგიონული მოთამაშის როლი.მაკა ბოჭორიშვილმა კიდევ ერთხელ დაადასტურა საქართველოს მზაობა, წვლილი შეიტანოს სამხრეთ კავკასიაში მშვიდობისა და სტაბილურობის ხელშეწყობის პროცესში.
მაკა ბოჭორიშვილმა მადლობა გადაუხადა ჰაქან ფიდანს საქართველოს სუვერენიტეტის და ტერიტორიული
მთლიანობის მტკიცე მხარდაჭერისთვის.
მინისტრების შეხვედრაზე განხილული იქნა რეგიონული და სატრანსპორტო ენერგეტიკული თანამშრომლობის გაღრმავების პერსპექტივებიც.
აღინიშნა შავი ზღვის რეგიონის სტრატეგიული მნიშვნელობა და არსებული პოტენციალის სრულად ათვისების აუცილებლობა.
ამასთან, განსაკუთრებული აქცენტი გაკეთდა აზერბაიჯანი-საქართველო- თურქეთის სამმხრივი სტრატეგიული პარტნიორობის პლატფორმის მნიშვნელობაზე, რომლის ფარგლებშიც სამი ქვეყნის საგარეო საქმეთა მინისტრების მორიგ შეხვედრას თურქეთი უმასპინძლებს.
ხაზი გაესვა “შუა დერეფნის” კონცეფციის გათვალისწინებით, ბაქო-თბილისი-ერზრუმის გაზსადენის, ბაქო-თბილისი ყარსის რკინიგზის, ბუნებრივი აირის სამხრეთ დერეფნის პროექტების მნიშვნელობას.
მაკა ბოჭორიშვილმა კოლეგა მისთვის სასურველ დროს საქართველოში მიიწვია.
