პოლონეთი არ აპირებს თავისი სამხედროების გაგზავნას უკრაინაში შესაძლო სამშვიდობო მისიის ფარგლებში. ამის შესახებ პოლონეთის პრემიერ-მინისტრმა დონალდ ტუსკმა განაცხადა.
„ჩვენ არ ვგეგმავთ პოლონეთის ჯარების გაგზავნას უკრაინაში, მაგრამ ლოჯისტიკურ და პოლიტიკურ მხარდაჭერას გავუწევთ იმ ქვეყნებს, რომლებსაც მომავალში ასეთი გარანტიების მიცემა სურთ“, - აღნიშნა ტუსკმა.
პოლონეთის პრემიერ-მინისტრმა 2024 წლის დეკემბერში უკვე უარყო უკრაინაში ჯარების გაგზავნის შესაძლებლობა.
სააგენტო dpa წერს, რომ ვარშავა ისტორიული მიზეზების გამო არ არის დაინტერესებული მსგავს მისიაში პირდაპირი მონაწილეობით - მეორე მსოფლიო ომამდე დღევანდელი დასავლეთ უკრაინის ტერიტორიის ნაწილი პოლონეთს ეკუთვნოდა.
შეგახსენებთ, დიდი ბრიტანეთის პრემიერ-მინისტრმა კირ სტარმერმა განაცხადა, რომ მზად არის უკრაინაში გაგზავნოს ბრიტანელი სამხედროები.
