უკრაინის პრეზიდენტმა ვოლოდიმირ ზელენსკიმ განაცხადა, რომ დონალდ ტრამპის სპეციალური წარმომადგენელი უკრაინასა და რუსეთში, კიტ კელოგი 20 თებერვალს კიევში ჩავა.
„კელოგს ველოდებით, შეთანხმება გვქონდა, რომ 20-ში ჩამოვიდოდა ჩვენთან, ორი დღე დარჩებოდა და შეიძლება მეტიც, მინდა მასთან ერთად წავიდე ფრონტზე და ის ჩემთან ერთად წამოვა ფრონტზე, ვფიქრობ, უარს არ იტყვის“, - განაცხადა ზელენსკიმ.
უკრაინის პრეზიდენტმა ვოლოდიმირ ზელენსკიმ თქვა, რომ მას სურს, რომ კელოგი პირადად ეწვიოს ფრონტს და ისაუბროს უკრაინელ სამხედროებთან.
ზელენსკიმ აღნიშნა, რომ ის და კელოგი გაემგზავრებიან უკრაინის შეიარაღებული ძალების მთავარსარდალთან, ოლექსანდრ სირსკისთან და რამდენიმე ბრიგადის მეთაურთან.
მისივე თქმით, ტრამპის წარმომადგენელს შეხვედრები, სავარაუდოდ, უკრაინის დაზვერვის ოფიცრებთან და თავდაცვის დეპარტამენტის წარმომადგენლებთან ექნება.
ზელენსკიმ აღნიშნა, რომ მნიშვნელოვანია შეერთებული შტატებისთვის უკრაინაში არსებული რეალური ვითარების და უსაფრთხოების გარანტიების მნიშვნელობის გადაცემა.
”ვფიქრობ, რომ მისი შეერთებულ შტატებში დაბრუნების შემდეგ ჩვენ უკვე გავიგებთ, როდის შედგება ჩემი შეხვედრა პრეზიდენტ ტრამპთან,” - აღნიშნა ზელენსკიმ.
