უკრაინის პრეზიდენტმა, ვოლოდიმირ ზელენსკიმ უარი თქვა ვაშინგტონთან წიაღისეულის შესახებ შეთანხმების ხელმოწერაზე. იუწყება სააგენტო Reuters. ზელენსკის განცხადებით, პროექტი არ მოიცავს უსაფრთხოების იმ ნაწილს, რომელიც კიევს სჭირდება.
„ეს დღეს ჩვენს ინტერესებში არ შედის. ეს არ არის სუვერენული უკრაინის ინტერესებში. აღნიშნული შეთანხმება არ გვიცავს. ის ჯერ არ არის მზად ჩვენი და ჩვენი ინტერესების დასაცავად. ჩემთვის ძალიან მნიშვნელოვანია, ვისაუბროთ ინვესტიციებზე და ეს სამართლებრივად სწორად, მართებულად უნდა იყოს ჩამოყალიბებული“, – განაცხადა ზელენსკიმ.
გამოცემის წყაროების ინფორმაციით, შეერთებულმა შტატებმა წარადგინა დოკუმენტი, რომელიც აშშ-ის მიერ უკრაინის კრიტიკული მინერალების 50 პროცენტის ფლობას ითვალისწინებდა.
ზელენსკის გუნდი დიდ მნიშვნელობას ანიჭებს იმას, რომ უკრაინამ აშშ-ისგან მიიღოს უსაფრთხოების გარანტიები, თუმცა, როგორც Reuters წერს, დოკუმენტი ამ გარანტიებს არ მოიცავდა.
შეთანხმების პროექტი კიევში აშშ-ის ფინანსთა მინისტრმა ვიზიტისას წარადგინა.
ზელენსკიმ განმარტა, რომ საუბარი არ არის მხოლოდ წიაღისეულზე, არამედ მისი თქმით, დოკუმენტში საუბარი უნდ იყოს იმაზეც, თუ რა არის მომგებიანი და ახსენებს უსაფრთხოების გარანტიებს.
"ეს ეხება ინვესტიციებს. და თქვენ შეგიძლიათ იფიქროთ იმაზე, თუ როგორ გადაანაწილოთ შემოსავალი, როდესაც უსაფრთხოების გარანტიები ნათელია. ჯერჯერობით მე ეს იქ არ დავინახე", - განმარტა ზელენსკიმ.
მანამდე ამერიკულმა მედიამ გაავრცელა ინფორმაცია, რომ ამერიკულმა მხარემ შესთავაზა აშშ-ისთვის წიაღისეულის 50%-იანზ წვდომის უფლება, რაზეც ზელენსკიმ უარი თქვა.
ამავდროულად, მიუნხენში შეერთებულმა შტატებმა სთხოვა ევროპას მოემზადებინა წინადადებები უკრაინის უსაფრთხოების გარანტიებისთვის.
