მიმაჩნია, რომ ეს არის ქვეყნისა და ხალხის დიდი ნდობა, რომელსაც, ეჭვი არ მეპარება, გაამართლებს - ამის შესახებ მიხეილ ყაველაშვილის ყოფილი მწვრთნელი, რუსეთის დუმის ყოფილი დეპუტატი ვალერი გაზაევი რუსული მედიაში წერს და ამბობს, რომ პირველივე წვრთნიდან ჩანდა, რომ ყაველაშვილი "დიდ მიზნებსა და ამოცანებს ისახავდა".
"მნიშვნელოვანია აღინიშნოს, რომ ყაველაშვილი ყოველთვის იყო ძალიან პასუხისმგებლიანი და ამავე დროს ის არის, ასე დავარქვათ, მსოფლიოს ადამიანი: თბილისი, ვლადიკავკაზი, ინგლისი, შვეიცარია და მის ფარგლებს გარეთ. მან მიიღო არა მხოლოდ საფეხბურთო გამოცდილება, არამედ ცხოვრებისეული და კულტურული და გაიფართოვა თვალსაწიერი" ამბობს გაზაევი.
გაზაევის თქმით, ყაველაშვილი ტოვებდა კარგი ლიდერის შთაბეჭდილებას.
"ძალიან ვწუხდი, რომ ის მანჩესტერ სიტიში წავიდა, მაგრამ ჩვენ ვერაფერს შევძლებდით, რადგან ის ჩვენთან იჯარით იყო. რომ არა, მეორე წელსაც ჩვენთან დარჩებოდა. თუმცა მან ძალიან სასიამოვნო შთაბეჭდილება დატოვა საკუთარ თავზე, როგორც სპორტსმენზე, როგორც ადამიანზე, როგორც ლიდერზე. შემთხვევითი არაა, რომ მას არჩეულ პრეზიდენტად ვხედავთ. ვთვლი, რომ ესაა ქვეყნისა და ხალხის დიდი ნდობა, რომელსაც, ეჭვი არ მეპარება, გაამართლებს,- თქვა გაზაევმა.
გაზაევის წერილი ინაუგურაციის პროცესამდე გამოქვეყნდა.
