ქართული მხარე ევროპარლამენტის მიერ აფხაზეთისა და ცხინვალის რეგიონების ოკუპირებულ ტერიტორიებად აღიარებას მიესალმება.
როგორც დღეს გამართულ ბრიფინგზე საგარეო საქმეთა მინისტრის მოადგილემ ნინო კალანდაძემ აღნიშნა, ქართული მხარისთვის ევროპარლამენტის მიერ ასეთი პოზიტიური რეზოლუციის მიღება მოულოდნელიც კი იყო.
"ევროპარლამეტი თავის რეზოლუციაში პირველად ადგენს აფხაზეთისა და ცხინვალის რეგიონის იურიდიულ სტატუსს, როგორც ოკუპირებულს და ამვდროულად საუბრობს იმაზე, რომ ოკუპირებულ აფხაზეთსა და ე.წ. სამხერთ ოსეთში ყოველდღიურად ირღვევა ადამიანის უფლებები", - აღნიშნა კალანდაძემ.
მისი ინფორმაციით, ევროპარლამენტმა ევროკავშირის სპეციალურ სტრუქტურებს მოუწოდა, აღნიშნულ ტერიტორიებზე ადამიანის უფლებების დარღვევის ფაქტების გამოვლენისთანავე დაუყოვნებლივი რეაგირება მოახდინონ.
შეგახსენებთ, რომ ევროპარლამენტმა შავი ზღვის ქვეყნებთან დაკავშირებით სტრატეგია დაამტკიცა. ეს არის ორგანიზაციის პირველი დოკუმენტი, სადაც ცხინვალის რეგიონსა და აფხაზეთთან მიმართებაში სიტყვა ოკუპაცია ჩაიწერა.
