საქართველოს ოკუპირებული ტერიტორიებიდან იძულებით გადაგილებულ პირთა განსახლებისა და ლტოლვილთა სამინისტრო პარლამენტის ვიცე-სპიკერს პაატა დავითაიას არაკომპეტენტური განცხადებების გაკეთებისგან თავის შეკავებას ურჩევს.

აღნიშნულის შესახებ სამინისტრომ ოფიციალური განცხადება გაავრცელა.

"პაატა დავითაიას მოვუწოდებთ, თავი შეიკავოს არაკომპეტენტური და რეალობას მოკლებული განცხადებების გაკეთებისგან. პოპულისტური განცხადებებით შეცდომაში შეჰყავთ საზოგადოება და შეურაცხყოფას აყენებს დევნილებს. განსახლების პროცესი მიმდინარეობს დევნილთა მიმართ სახელმწიფო სტრატეგიის სამოქმედო გეგმის თანახმად და საერთაშორისო ორგანიზაციებთან ერთად შემუშავებული სპეციალური ოპერაციული პროცედურების მიხედვით", - ნათქვამია განცხადებაში.

ამასთან, სუბელიანის უწყების მტკიცებით, დევნილთა გამოსახლების პროცედურები შესაბამისობაშია ადგილობრივ კანონმდებლობასა და გაეროს იძულებით გადაადგილებულთა შესახებ სახელმძღვანელო პრინციპებთან.

შეგახსენებთ, რომ დღეს ასზე მეტი დევნილი ოჯახი სტუდქალაქის კორპუსებიდან და ორხევში ყოფილი საბაჟო დეპარტმანეტის შენობიდან პოლიციამ იძულებით გამოასახლა.

აღნიშნულს პარლამენტის ვიცე-სპიკერი პაატა დავითაია გამოეხმაურა და განაცხადა, რომ დღევანდელი ხელისუფლება ხალხის წინააღმდეგ ისეთივე სადამსჯელო ღონისძიებებს ახორცილებს, როგორსაც სპარატისტები იყენებდნენ.

დღესვე დავითაიამ საჯარო რეესტრის მიერ გაცემული ოფიციალური ინფორმაცია წარმოადგინა, რომლის მიხედვით ფართი მხოლო 7257 დევნილს დაუკანონა ფართი და არა 20 000 ათასს, როგორც ამას ლტოლვილთა სამინისტრო აცხადებს.