ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო ოპოზიციურ პარტიებს პოლიტიკური ქულების დაწერის მიზნით დევნილების გამოყენებაში ადანაშაულებს.
"სამწუხაროა, რომ ოპოზიციური პარტიების წარმომადგენლები, პოლიტიკური ქულების დაწერის მიზნით, ავრცელებენ უპასუხისმგებლო და არაკომპეტენტურ, ყოველგვარ რეალობას მოკლებულ განცხადებებს. ასეთი არაადეკვატური განცხადებებით ისინი დევნილებს დაფიქრებისა და არჩევანის საშუალებას არ აძლევენ", - ნათქვამია სუბელიანის უწყების განცხადებაში.
ამასთან, სამინისტრო კიდევ ერთხელ განმარტავს, რომ განსახლების პროცესი დევნილთა მიმართ სახელმწიფო სტრატეგიის სამოქმედო გეგმის თანახმად და საერთაშორისო ორგანიზაციებთან ერთად შემუშავებული სპეციალური ოპერაციული პროცედურების მიხედვით მიმდინარეობს.
"ეს პროცედურები შესაბამისობაშია ადგილობრივ კანონმდებლობასა და გაერო-ს იძულებით გადაადგილებულთა შესახებ სახელმძღვანელო პრინციპებთან", - აღნიშნულია განცხადებაში.
შეგახსენებთ, რომ დევნილთა გამოსახლეობის პროცესი, რომელიც საახალწლოდ დროებით შეჩერდა, დღეს განახლდა. იძულებით გადაადგილებულ პირებს რამდენიმე შენობა დღეს პოლიციელებმა დაატოვებინეს. ისინი ალტერნატიულ საცხოვრებელ ფართებს საქართველოს რეგიონებში მიიღებენ.
