"თავისუფალი დემოკრატები" დევნილების გამოსახლების შესახებ განცხადებას ავრცელებს.
ალასანიას პარტიის განცხადების მიხედვით, ხელისუფლება განაგრძობს საკუთარ მოქალაქეებზე ძალადობას და იმ უკანონო ქმედებების განხორციელებას, რასაც ის ასე ხშირად იყენებს.
"ამ წუთებში თბილისში, ლტოლვილთა ჩასახლების ადგილებიდან ხდება მათი მასობრივი გამოდევნა და გადაყვანა გაურკვეველი მიმართულებით. გაუგებარია თუ რატომ მიმართავს ამ უკანონო და ანტიჰუმანურ ზომებს ხელისუფლება თავისი იმ მოქალაქეების წინააღმდეგ, რომელთაც ისედაც დიდი განსაცდელი დაატყდათ თავს და უკვე რამდენი წელია უშედეგოდ ცდილობენ თავიანთ საცხოვრებელ ადგილებში დაბრუნებას. ან რა მიზანი აქვს ამ აქციის შუა ზამთარში განხორციელებას. დღეს ასახლებენ ძირითადად იმ დევნილებს, რომლებმაც საცხოვრებელი მიხეილ სააკშვილის უპასუხისმგებლო პოლიტიკის შედეგად, 2008 წლის ომის დროს დაკარგეს", - აღნიშნულია განცხადებაში.
"თავისუფალი დემოკრატები" გმობენ დევნილების გამოსახლებას და მოითხოვენ, რომ ხელისუფლებამ დაუყოვნებლივ შეწყვიტოს დევნილების გამოსახლება და ამ ადამიანებს შესთავაზოს მათთვის მისაღები რეალური ალტერნატივა.